DILI, STLTIMORLESTE.com – Primeiru Ministru (PM), Kay Rala Xanana Gusmão hatoo dejeza feliz paskua ba povu tomak, husu joven sira mantein pas iha idak-idak nia hela fatin.
Primeiru Ministru kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (02/04/2026).
Primeiru Ministru hatete, kada semana rua Primeiru Ministru simu informasaun husi Ministeriu Interiór husi polisia saida mak akontese kona-ba asaltu malu, naok, kona-ba violensia iha Timor labele dehan katak aat liu mais sempre iha ho situasaun sira nee mak Governu fo hanoin malu ona ho ministeriu sira husi MAE, PAM ba postu no suku, nunee kada suku hatene kuandu iha problema bolu labarik sira koalia atu evita susar.
“Paskua husu liu liu ba joven sira katak hasae aan oituan tanba paskua fo lembra ba ita terus, Jesus ema kaer, ema dadur lori ba tau iha Kruz terus ninia ho ida nee mak joven sira hotu iha periodu paskua nee hakaas aan hodi redus oituan tensaun iha familia rasik no iha komunidade.
Timor rai ida nee iha fatin hotu-hotu dehan rai lao ho diak laiha violensia, kuandu temi hanesan nee signifika Timor laiha violensia neebe boot mais iha violensia kiik oan sira, tanba nee joven sira mak tenke hanoin didiak oinsa mak kria dame iha familia, sosiedade lao ho diak.
Primeiru Ministru (PM), Kay Rala Xanana Gusmão dezeja felíz paskua ba povu iha teritoriu nasional no iha diaspora.
Iha biban nee Xefe Governu husu ba populasaun en-jeral liu-liu juventude sira atu mantein paz no estabilidade durante festa paskua hodi lori hakmatek ba sosiedade.
“Neebe joven sira tenke hanoin didiak oinsa mak bele komporta ho diak ba sira-nia aan rasik, komunidade no família. Nee duni ita hotu husu, ita hotu dejeza felíz paskua ba povu tomak, paskua tempu ida atu halo reflesaun hodi hadia aan,” PM Xanana hateten.
Kada semana rua, Xefe Governu sempre simu relatoriu husi Ministeriu Interior (MI) ho Polísia Nasional Timor Leste (PNTL) kona-ba krime sira neebe mak akontese iha Timor Leste (TL).
Relatoriu nee hatudu katak, violensia iha Timor la aat liu maibe akontese, tanba nee parte relevante sira koordena ona atu relatoriu nee partilha mos ba Ministeriu Administrasaun Estatal (MAE), Autoridade Munisipal hotu, nunee kada suku hatene katak iha suku ida nee ka ida neeba iha problema.
(eme)
