DILI, STLTIMORLESTE.com – Prezidente Republika (PR), Jose Ramos Horta hasoru malu ho Komunidade Sant Egidio iha palasiu, hodi reforsa Pas Global.
Prezidente Republika, Jose Ramos Horta simu Valeria Martano husi Komunidade Sant Egidio iha Palasiu Prezidensial, hodi hametin liu tan relasaun neebe kleur ona entre lider Timoroan nee ho klibur laikal internasional hodi reforsa pas iha Global.
Bainhira remata hasoru malu, Rejional Coordinator for Asia Community Of Sant Egidio, Valeria Martano ba jornalista sira iha Palasiu Prezidensial Nicolau Lobato, Bairo Pite, Kuarta (01/04/2026) hatete, hasoru malu ho Prezidente Republika hodi koalia kona-ba pas Global.
“Foin hau hasoru malu ho Prezidente Republika no antes nee hasoru malu ona, ami iha uma iha fulan hira ba kotuk, no ami koalia asutu lubuk ida, primeiru oinsa hametin pas iha ASEAN laran, tanba Komunidade Sant Egidio halao misaun dame nia iha nasaun oin oin,” dehan nia.
Nia hatete, enkontru nee serve hanesan kontinuasaun ba vizita foin lalais Prezidente nian ba sede organizasaun nee nian iha Roma. Martano destaka istoria hamutuk iha harii pas, liu-liu hanoin fali kolaborasaun istorika Prezidente nian ho Kardenal Matteo Zuppi durante prosesu pas iha Moçambique.
Tema sentral husi diskusaun nee mak nesesidade urjente ba estabilidade iha Azia, ho foku espesífiku ba krize neebe akontese iha Mianmar.
Komunidade Sant Egidio reafirma fali nia kompromisu ba mediasaun internasional, hodi alina ho Prezidente Ramos Horta nia advokasia ba solusaun diplomatika ba konflitu rejional sira. Parte rua nee enfatiza katak mantein dialogu neebe persistente importante tebes hodi rezolve dezafiu umanitariu no polítiku kompleksu sira neebe mundu enfrenta ohin loron.
Enkontru nee mos sublina kontribuisaun sosial ativu husi Komunidade nee iha Timor Leste, iha neebe membru lokal atus ba atus mak lidera inisiativa sira hanesan “Eskola ba Pas” ba labarik kbiit-laek sira no programa rejistu sivíl.
Iha hasoru malu nee Prezidente Republika Jose Ramos Horta hatoo nia apresiasaun klean ba esforsu hirak nee, no remata vizita nee ho apelu ba parte hotu-hotu atu nunka entrega aan ba situasaun difisil sira no nafatin hamriik metin iha esforsu ba buka pas.
(eme)
