BAUKAU, STLTIMORLESTE.com – Membru FALINTIL tinan 24 neebe daudaun ativu iha Instituisaun Estadu Forsa Defeza Timor Leste (FDTL) halo natar iha Suku Seiçal, Postu Administrativu Baukau Vila, Munisipiu Baukau.
Membru FALINTIL Marcos da Cruz Soares “Boulesa” esplika, daudaun Governu Timor Leste aplika ona lei reforma ba FALINTIL tinan 24 neebe sei ativu iha Instituisaun Estadu Forsa Defeza Timor Leste no bainhira reforma, tanba kestaun idade, maibe bainhira reforma FALINTIL seluk neebe iha kapasidade sei hetan oportunidade, tanba haree husi titulu, enkuantu FALINTIL seluk neebe laiha kapasidade sei la hetan oportunidade atu sai responsabilidade ba kargu ruma iha Instituisaun Estadu ida, tanba nee FALINTIL tinan 24 neebe uluk ativu iha Frente Armanda atual ativu mos iha Instituisaun Estadu Forsa Defeza Timor Leste hanesan Maulindo, Farli, Carlito Somoço inklui Boulesa halo natar iha Seiçal.
“Veteranus 24 ami nain 4 nee mak hamutuk halo natar, tur iha kantor parlamentu nee mak ami laiha kapasidade maibe halo natar ami bele, dala barak ami triste tanba 24 anos ba iha ailaran harii nasaun ida nee ema mak aproveita,” hateten Boulesa ba jornalista sira iha natar laran Seiçal, Sabadu (04/04/2026).
Nia rekonhese, hafoin kontribui ba luta libertasaun nasional durante tinan 24 iha ai laran hasoru invazor Indonezia too faze Timor ukun aan nee, Estadu Timor Leste rekonhese membru FALINTIL sira maibe rekonhesimentu neebe Estadu Timor Leste fo liu husi pensaun veteranus kada fulan seidauk sufisiente, tanba razaun iha familia no nesesidade kultura.
Nunee antes atu too faze reforma ba sira nain 4, Boulesa konsiente no relembra hikas ba Komandante FALINTIL David Alex Daitula nia liafuan, neebe uluk apela ba nia membru sira iha ai laran no akontese duni ba sira iha tempu Timor ukun aan.
“Momentu katuas Daitula sei moris nee hateten liafuan ida hanesan nee, labarik sira kuidadu hau, bainhira iha funu ida nee mak imi la kuidadu hau aban bainrua hau mate imi sai zero kortadu, agora sai realidade duni,” Boulesa haktuir.
Iha fatin hanesan, membru FALINTIL Manuel Soares “Maulindo” fundamenta, razaun halo natar iha Suku Seiçal, tanba besik ona atu reforma husi Instituisaun Estadu Forsa Defeza Timor Leste no rekonhese, Komadante David Alex Daitula nia liafuan sai realidade ba nia membru sira faze ukun aan.
“Hau nia kolega koalia nee loos, tanba uluk ami hamutuk katuas Daitula koalia kedas hanesan nee, aban bainrua ema haree imi diak lae dala ruma la haree imi, maibe funu nia hahalok nia mate, agora ami hela forma grupu halo servisu ida nee,” Maulindo akresenta.
Nia rekonhese, sira nia luta durante tinan 24 iha ai laran hasoru invazor Indonezia too iha faze ukun aan, Estadu Timor Leste fo rekonhesimentu liu husi pensaun veteranus kada fulan, maibe seidauk sufisiente, tanba nee halo natar hodi sustenta nesesidade familia iha vida reforma.
Maulindo mos hakarak atu goza hanesan maluk veteranus sira seluk neebe iha kompanhia, maibe laiha kbiit atu harii kompanhia hodi hetan benefisiu husi Estadu, tanba laiha finanseiru.
Nunee antes atu ba vida reforma, transforma aan sai vida agrikultura hodi sustenta nesesidade familia iha futuru mai.
Entretantu natar neebe membru FALINTIL nain 4 nee halo iha Suku Seiçal, Postu Baukau Vila hamutuk hektare 6.
(tom)
