AMBENO, STLTIMORLESTE.com – Pe. Mouzinho Perreira Lopez sente orgulhu no agradese ba sarani no povu Oecusse, tanba Oecusse nee ema diak, ema nee laran luak, ema neebe familiar tebes, relasaun familia nee forte, ida nee liga tebes ho santa kreda ninia dutrina no sarani Oecusse nia fee la nakdoko dezde inisiu Kristianizmu tama Timor Leste (TL) liu husi Odamatan Lifau Oecusse, kultura nee nafatin metin too ohin loron hamutuk ho Senhor Mortu neebe kada tinan sarani barak deside paskua iha Oecusse, tanba senhor Mortu milagrozu, buat hotu neebe sarani husu sempre hetan diak.
“Hau orgulhu Oecusse, agradese ba sarani no povu Oecusse, tanba Oecusse nee ema diak, ema nee laran luak, ema nee familiar tebes, relasaun familia neebe forte, komunhiaun, ida nee liga tebes ho santa kreda ninia dutrina, neebe ho baze hirak nee, hau espera Oecusse bele guarda didiak ninia kultura no lisan ida nee, maibe presiza rona saida maka uma kreda hanorin kona ba Jesus ninia prezensa iha Oecusse,” dehan Pe. Mouzinho Perreira Lopez, reprezenta Sua Eminensia Dom. Virgilio prezide selebrasaun solene Liturjia da Palabra hodi hanoin Paisaun de Kristo iha loron Sesta Feira Santa, Hanoin Jesus Nia terus too Mate Liu husi Adorasaun Cruz Santa no prosisaun Senhor Mortu iha Igreja Tuan Santo Antonio Oecusse, Sesta (03/04/2026).
Nia dehan, Senhor mortu iha TL nee iha rua ou tolu, maibe Senhor Mortu iha Oecusse maka boot, liga ho lisan, kultura no istoria, ohin loron tau hamutuk ho serimonia boot Igreja tomak nian, laos selebra deit liu husi loron boot Paskua, maibe sarani tenke valoriza tiha lai paisaun de Kristu, Jesus Kristu nia mate nuudar sarani, hodi organiza ho diak, tanba ema konsiente ona.
“Hau hanoin, ema barak tenke kompriende didiak Jesus Kristu ninia prezensa iha ninia isin mate nee, barak hakarak hadau, haree, sei ema hatene ona ninia valor nee, ema la dez-rganiza. Agora ema hahu hanoin ona, hahu husi adat, ho igreza, Dioceze ho ita nia Arcebispo Metropolitana Dioceze Dili ho estadu TL, oinsa halo melhoramentu tiha, primeiru tuir Jesus Kristu ninia Paisaun, segundu tuir tradisaun hodi nunee, promove liu husi turizmu Relijiozu, ema hotu tenke hatene uluk lai, Jesus mate tanba saida, hanesan livru Izaes konta mai ita, Nai Jesus mate tanba ita nia arogansia, ita ema nia aat ba mundu nee, Jesus la lakon ninia ilhas ho ninia kriasaun primeiru neebe folin liu hotu-hotu, maka Jesus Kristu hakarak hakbesik ho ninia ema sira, nunee nia fo ninia moris mai ita. Agora maromak fo ona ninia moris, ita maka kontinua odio malu nafatin, vinga malu tanba deit osan, partidu, grupo sira neebe maka la jelas,” dehan Pe. Mouzinho Perreira Lopez, reprezenta Sua Eminensia Dom Virgilio Prezide selebrasaun solene paskua iha Oecusse.
Nia dehan, maromak mai reprezenta aan mate tanba sarani sira, agora knaar sarani sira nian maka halo tuir nia no lao tuir nia. Sei sarani sira lao tuir nia, buat sira hanesan direitus Umanu, igualdade, buat sira nee Liberdade, tenke pratika iha vida moris loron-loron nian ho fasilmente.
“Hau husu ba ema hotu-hotu atu hatene uluk lai, maromak halo sakrifisiu saida ona mai ita, iha Jesus Kristu nia paisaun.
Iha biban nee, Amo Administrador Parokia Nossa Senhora do Rosario Oecusse, Pe. Florindo de Jesus, hatoo agradesementu ba Pe. Mouzinho Perreira Lopez reprezenta Sua Eminensia Dom. Virgilio Cardeal do Carmo da Silva SDB ho Amo sira hotu husi rai boot inklui Madres sira hotu neebe mai tulun selebra misa Paskua iha Oecusse. Agradese ba Governu TL liu husi Ministeriu Turizmu ho entidades tomak neebe apoiu Igreja hodi realiza serimonia solene loron boot Paskua, hahu husi Kinta Feira Santa, hanoin Jesus Fase Ain ba Apostolu sira, Sakramentu Eukaristia no Jesus Nia Terus ba Salvasaun no moris hias iha loron Sabadu Aleluia no Domingu resuresaun.
“Hau lori sarani no povu Rejiaun Administrativa Espesial Oecusse-Ambeno nia naran, hatoo agradesementu ba Amo Selebrante sira hotu, Madre sira ho bainaka sira husi munisipiu seluk inklui estranjeiru neebe maka tinan nee hamutuk selebra Festa paskua iha Oecusse. Hau agradese ba Governu TL liu husi Ministeriu Turizmu ho instituisaun estadu sira hotu neebe apoiu finanseiru hodi selebra loron boot paskua iha Oecusse,” dehan nia iha deskursu.
Nunee mos Pe. Luis Gouveia Leite iha misa Kinta feira santa iha Igreja Tuan Santo Antonio Oecusse dehan, ho paskua ida nee, hakarak selebra iha sarani sira nia moris, hakarak mate ba salah hirak neebe halo ona iha mundu, atu moris hamutuk ho Kristu.
“Ho paskua ida nee, ita hakarak selebra iha ita nia moris, ita hakarak mate duni ba ita nia salah hirak nee iha mundu, atu ita moris hamutuk ho Kristu, hodi bele selebra festa paskua, ita bele kanta Aleluia, selae ita moris iha sesta feira santa hela deit, tanba salah hanehan nafatin ita, salah hadok ita nafatin ho maromak, salah fahe ita nia klamar ho maromak,” dehan nia.
Tuir observasaun STL iha selebrasaun Paskua tinan 2026 iha Oecusse, iha kina fera santa, sarani hotu-hotu iha Oecusse, konsentra iha sira nia kapela no parokia, iha selebrasaun solene Jesus ninia paisaun, realiza liu husi Viasakra no lokraik realiza iha Igreja Tuan Santo Antonio Oecusse, ema wain ba wain maka hola parte tanba hafoin selebrasaun solene kontinua kedan ho prosesaun senhor Mortu remata ho halerik tuir lisan Oecusse nian, remata ho bensa no rei senhor Mortu too tuku 3:00 dader san madrugada, lia nain suku 20 iha Oecusse, halot hikas fali Senhor Mortu iha ninia fatin.
(god)
