DILI, STLTIMORLESTE.com – Ema idak-idak presiza loke fuan ba Maromak hodi rekonhese hahalok neebe halo, tanba Jesus sempre lao hamutuk ho ema hotu.
Lia hirak nee hatoo husi Padre Richardo Pasang, SVD ba STL liu husi nia reflesaun loron Kuarta (08/04/2026) katak, dala barak ema hasoru dezafiu oin-oin iha moris maibe Jesus sempre akompanha, tanba nee presiza loke fuan ba jesus ba hahalok neebe halo ona.
Padre dehan, reflesaun Kuarta feira, 8 Abril 2026, foti husi Apostolu sira nia hahalok 3:1-10 no Lucas 24:13-35, Apostolu sira-nia hahalok 3:1-10.
Pedro no João kura mane ain-kudeik ida iha Portaun Furak Templu nian. Mane nee, neebe aleijadu dezde moris, husu esmola ba sira. Pedro dehan “Hau la iha osan mean ka osan mutin, maibe buat neebe hau iha, hau fo ba o: hodi Jesus Kristu Nazare nia naran lao ba, mane nee rekupera kedas no lao, halai tun sae no hahii Nai,” katak Padre.
Nunee mos iha evanjelhu Lucas 24:13-35, dixipulu nain rua lao ba Emaus, sente deziluzaun no laiha esperansa hafoin Jesus nia mate.
Jesus hakbesik ba sira, maibe sira la hatene Nia. Nia esplika Eskritura ba sira, no sira nia laran lakan makaas. Bainhira Jesus silu paun, sira hatene katak Nia, maibe Nia lakon tiha. Sira fila fali ba Jerusalem no fo sai kona-ba Jesus nia moris hias.
“Dala barak ita sente deziludidu no dezanimadu, maibe Jesus sempre prezente no lao hamutuk ho ita. Nia rona ita nia lamentasaun no kura ita nia kanek sira. Mai ita loke ita nia fuan ba Nia no rekonhese Nia iha akontesimentu hotu-hotu iha ita nia moris. Ita nia fuan la sunu iha ita nia laran bainhira Nia koalia ho ita iha dalan?” dehan Padre.
Bibi Atan Kreda Katolika nee dehan, dala barak ema lakon esperansa maibe Jesus sempre akompanha iha moris idak-idak, tanba nee husu ema idak-idak nafatin tau konfiansa iha Jesus Kristu, tanba Nia mak hun no rohan laek.
Nunee mos Padre Richardo Pasang, SVD hatutan, evanjelhu Kuarta Feira (08/04/2026) haktuir istoria kona-ba dixipulu nain rua nia viajen ba Emaus, bainhira sira laran-tun, triste no laiha esperansa tanba sira nia Nai no Mestre mate iha krus.
Sira nia esperansa iha Jesus neebe makaas troka ho sentimentu mesak, derrota no dezesperu. Maibe Kristu moris-hias lao hamutuk ho sira, koalia ho sira, no ikus mai silu no fahe paun ho sira.
Depois han hamutuk ho sira, Cleopas ho nia maluk sira hatene katak Jesus mak lao, koalia no han hamutuk ho sira. No hafoin aprende Jesus nia identidade, sira nia solidaun no dezesperu troka kedas ho ksolok no vigor foun.
“Bainhira ita iha ita nia pontu kiik liu iha solidaun no dezesperu, ita tenke hanoin nafatin katak Jesus nafatin iha ita nia sorin, lao hamutuk ho ita, prontu nafatin atu rona. Nia hakarak fo esperansa mai ita, Nia hakarak inspira ita, no Nia dehan mai ita: Esperansa, tanba hau moris hias ona,” dehan Padre.
(eme)
(eme)
