KUPAN, STLTIMORLESTE.com – Primeiru-Ministru (PM) Timor-Leste, Kay Rala Xanana Gusmão promete sei lori boxista Timoroan sira partisipa iha kompetisaun Boxing Lazarus Laiskodat Memorial Cup 2027, nu’udár esforsu ida atu hametin amizade, promove dame no dezenvolve desportu boxing entre Timor-Leste no Indonézia.
Promesa ne’e PM Xanana hato’o, bainhira asiste diretamente kompetisaun finál Boxing Lazarus Laiskodat Memorial Cup III 2026, ne’ebé hala’o iha Estádiu Lazarus Laiskodat, Desa Otan, Illa Semau, Distritu Kupang, Provínsia Nusa Tenggara Timur (NTT), Indonézia, Sabadu (07/11/2026).
Iha rohan kompetisaun, PM Xanana hetan oportunidade atu entrega prémiu bá atleta sira ne’ebé konsege hetan vitória iha kompetisaun ne’e.
Iha oportunidade ne’e, PM Xanana hato’o apresiasaun bá komisaun organizadora ne’ebé konsege organiza kompetisaun ho susesu, no bá atleta hotu-hotu ne’ebé partisipa, liuliu sira ne’ebé hatudu kapasidade no konsege hetan rezultadu di’ak.
PM Xanana subliña katak, kompetisaun desportiva hanesan ne’e iha papél importante la’ós de’it atu dezenvolve kapasidade no talentu atleta, maibé mós atu harii dame iha ema ida-idak nia laran, hametin dame iha sosiedade no promove kultura dame iha rejiaun.
“Ha’u promete katak, tinan oin boxista hosi Timor-Leste sei partisipa iha kompetisaun ne’e. Ha’u admira tanba atleta barak mak partisipa iha eventu ida-ne’e, mai hosi provínsia oioin iha Indonézia. Tenke nune’e duni atu bele haburas dame iha rejiaun. Ohin loron mundu buras ho funu, iha ita-nia rejiaun, liuliu ita la’ós de’it viziñu, maibé maun-alin. Ita tenke promove dame entre ita liuhosi desportu,” PM Xanana hateten.
Partisipasaun PM Xanana iha eventu desportivu ne’e nu’udár parte ida hosi ajenda vizita amizade bá NTT, tuir konvite hosi eis-Governadór NTT, Víktor Bungtilu Laiskodat, ne’ebé agora nu’udár membru Parlamentu Indonézia.
Boxing Lazarus Laiskodat Memorial Cup III 2026 mak kompetisaun boxing amadora ne’ebé involve atleta hamutuk 334, mai hosi Provínsia NTT no provínsia seluk iha Indonézia.
Kompetisaun ne’e organiza ho objetivu atu buka no dezenvolve talentu boxista foun, liuliu juventude, hametin kualidade treinamentu no prepara atleta potensiál sira bá kompetisaun desportiva nasionál, inklui Pekan Olahraga Nasional (PON) 2028 no 2032.
Aleinde sai plataforma bá formasaun no rejenerasaun atleta, eventu ne’e mós kontribui bá promosaun desportu boxing, dezenvolvimentu juventude no hametin relasaun amizade entre povu sira.
(jos)
