DILI, STLTIMORLESTE.com – Dili Institute Of Technology (DIT) ho Instituto Ciência Saude (ICS) hatama ona proposta subvensaun nian ba Ministériu Ensinu Superior Siensia no Kultura (MESSK), maibe seidauk iha informasaun husi ministériu refere.
Lia hirak nee hatoo husi Reitor DIT, Salustiano dos Reis Piedade ba jornalista STL iha nia knaar fatin, Kinta nee (09/04/2026).
“Ami seidauk iha informasaun, tanba husi ministeriu seidauk iha informasaun mai ami, maibe ami nian proposta ami hatama tiha ona, ami mos seidauk hatene, bainhira husi ministériu halo ona transferensia kontaktu ami, maibe seidauk iha kontaktu ruma ba ami,” nia esplika.
Reitor DIT nee hatutan, baibain iha proposta nee hakerek kedas Institute ninia konta bankaria, bainhira atribui ona nee sira uza kedas Konta bankaria nee, atu nunee sira halo transferensia mai iha rekening nee.
“Seidauk iha informasaun husi ministériu, ami nian proposta ami hatama ona ba ita nian Ministériu Ensinu Superior, agora kona-ba atribuisaun nee, ami mos seidauk iha informasaun ruma,” nia dehan.
Iha sorin seluk, Reitor Instituto Ciência Saude (ICS), Leao Borges hatete, proposta subvensaun públika nee hatama dezde iha fulan Marsu tinan ida nee, agora kona-ba subvensaun nee seidauk iha imformasaun ruma husi ministeriu.
“Subvensaun nee seidauk tama iha ami nian konta bankaria, no seidauk iha informasaun ruma husi ministeriu kona-ba ida nee, maibe ami nian proposta ba subvensaun nee ami hatama tiha ona ba ministériu,” nia afirma.
Nia dehan, proposta nee hatama ona, bainhira subvensaun nee tama konta bankaria mak instituto sei fo apoiu ba iha dosente no estudante sira, tanba nee importante tebes, nunee mos apoiu ba iha peskiza ninian.
(jac)
