DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE) seidauk simu informasaun husi koordenador sira, liga ba implementasaun programa merenda eskolar neebe lao iha eskola sira.
Hatete Xefe Departamentu Programa Merenda Eskolar iha Ministeriu Edukasaun, Belchior Maria Almeida Barros ba jornalista STL iha nia knaar fatin, Kinta nee (09/04/2026).
“Implementasaun merenda eskolar ba segundu periodu hau seidauk hetan informasaun husi koordenador munisipiu sira, hahu ohin eskola sira hahu ezame primeiru periodu, orientasaun husi Ministeriu Edukasaun mak eskola sira kontinua merenda. Agora merenda lao ou lae, hau seidauk hetan informasaun husi koordenador sira, espera munisipiu sira lao hela, atu nunee ita nian estudantes sira bele asesu ba iha programa ida nee ho diak liu tan,” nia haktuir.
Nia dehan, too agora ninia parte seidauk simu informasaun husi koordenador sira, tanba normalmente koordenador sira wainhira iha munisipiu sira la lao sira sempre informa liu husi grupu WA neebe mak sira kria ona.
Iha fatin seluk, Koordenador Ensinu Baziku Filial (EBF) nu. 5 Komoro, Marcelino Moniz hatete, estudantes husi Ensinu Baziku Filial (EBF) nu. 5 Komoro konsumu aifuan lokal no naan karau iha programa merenda eskolar.
“Implementasaun programa merenda eskolar lao diak hanesan baibain, menu neebe mak eskola uza nee hanesan baibain, nee mak uza produtu lokal, hanesan Modo tahan, aifuan lokal pateka, aidila, apel no ayam potong, sosis, ikan nee la tama iha menu, tanba ami uza deit naan karau,” nia informa.
Tuir Marcelino katak, nee duni semana ida nia laran sira han deit naan karau, modo tahan no produtu seluk tan, estudantes rihun rua resin mak asesu ba iha programa merenda eskolar, tanba nee kada loron estudantes sira asesu ba iha programa nee ho diak tebes, no ema neebe tein ba estudantes sira nee hamutuk nain 10.
“Ami nian estudantes husi eskola ida nee fahe ba iha turnu haat, tanba nee ema neebe tein ba ita nian estudantes sira han nee nain sanolu, ho nunee tein ba estudantes dader meudia no loraik, tanba ita fahe ba iha turnu haat,” nia haktuir.
(jac)
