DILI, STLTIMORLESTE.com – Governu fo autorizaun ba Ministeriu Finansas (MF) halo akordu ho KOICA hodi haree ba merenda eskolar.
Lia hirak nee hatoo husi Primeiru Ministru Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta iha Palásiu Prezidensial Nicolau Lobato, Bairo Pite, Kinta (09/04/2026).
PM Xanana hatete, Governu fo autorizasaun ba Ministeriu Finansas halo akordu ho KOICA, nunee haree ba merenda eskolar.
“Fo autorizasaun ba Ministeriu Finansas halo akordu ho KOICA. Imi haree Bebora, sira asina akordu ida neebe ida atu haree ba alimentasaun, liu-liu mos fokus oituan mos ba iha merenda eskolar. Neebe horiseik mos hau fo lembra ba Ministra Edukasaun katak, uluk ami sei kiik nee han fehuk, aifarina, nee mak agora sei bele lao oituan. Tanba foin daudaun lao haleu munisípiu sira, asuntu ida mak merenda eskolar, tanba iha neeba atu temi 75% hahan neebe fo ba alunu sira tenkeser husi komunidade. Mais, horiseik mos hau fo lembra ona ba Ministra Edukasaun atu fahe merenda eskolar ba alunu, sira fahe fali nasi kotak nee haree ba hahan barak, modo tahan, naan, ikan, kulu, labarik sira lori ba loke barak demais. Neebe horiseik mos ami lembra, la diak, fo natoon nunee lae, ita estraga deit, neebe buat barak ita tenke kurije nafatin,” dehan Primeiru Ministru.
Primeiru Ministru hatete, iha akordu ida fali kona-ba reflorestasaun, tuir Primeiru Ministru dehan diak, kapas loos.
“Hau hakfodak iha neeba temi fatin ida mos Obratu Manatuto, nee mak ohin koalia ho Prezidente Republika dehan, loos duni ita nain rua ba ONG ida mak bolu ami nain rua ba kuda aikameli. Neebe kontente tanba KOICA ninia projetu nee dehan atu kuda mos buat balun iha Obratu-Manatutod” dehan PM Xanana.
Xefe Governu hatete, fo lembra ba nia, sai tiha husi Manatuto, liu tiha estadiu sae too ba leten, iha foho lolon nee husi Sekretariu Estadu Floresta konvida husi too iha neeba, atu halo reflorestasaun kuda aikameli.
Nunee mos iha Konselhu Ministru aprezentasaun husi Vise Ministra Finansas, Regina de Jesus, Konselhu Ministrus delibera hodi autoriza Ministra Finansas atu asina akordu subvensaun rua ho Ajensia Kooperasaun Internasional Korea (KOICA) ba projetus kona-ba Dezenvolvimentu Kapasidade Restaurasaun Florestal no Jestaun Sustentavel iha Timor Leste (2026–2033) no mos Programa Integradu Nutrisaun no Seguransa Alimentar, Alimentasaun Eskolar, Fortifikasaun Alimentar, Fortifikasaun Ai-han no Infraestrutura Eskolar sira (2026–2030).
Projetu restaurasaun floresta nee ho subvensaun prevee milhaun US$ 6 no durasaun tinan 6, kobre Munisipiu Baukau no Manatutu. Ninia objetivu mak reforsa prevensaun ba degradasaun ambiental no promove rekuperasaun ekosistema florestal sira, liuhosi modernizasaun sentru viveiru nasional, implementasaun programa reflorestasaun, no mos kapasitasaun instituisoins publikas no komunidade lokal sira. Prevee mos envolvimentu diretu husi tekniku no funsionarius publiku, no mos partisipasaun ativa husi komunidade sira iha jestaun sustentavel ba floresta.
Programa nutrisaun no seguransa alimentar ho orsamentu milhaun US$ 7,2 no ho durasaun tinan 5, sei implementa iha Munisipiu Baukau, Bobonaro, Manufahi no Vikeke. Projetu ida nee ho objetivu atu hadia kondisaun ai-haan no nutrisaun eskolar liu husi reforsa infraestrutura no ekipamentu dapur eskolar, implementa sistema jestaun no monitorizasaun, fortifikasaun ai-han, no mos promove kadeia fornesimentu bazeia ba produsaun agríkola lokal. Inklui mos formasaun ba profesor sira, pesoal estabelesimentu ensinu nian, no komunidade sira, no mos apoiu ba dezenvolvimentu agrikultura lokal hodi fornese ba eskola sira.
(eme)
