DILI, STLTIMORLESTE.com – Prezidente Republika (PR), Jose Ramos Horta promete sei apoiu ba agrikultura no Kualidade Edukasaun Nivel Internasional iha vizita ba Cailaco.
Iha vizita ida ba Eskola Sekundaria Teknika Vokasional Dom Bosco Maumali, Calico, Munisipiu Bobonaro, Kuarta (08/04/2026) Prezidente Republika Jose Ramos Horta reafirma hikas ninia kompromisu ba dezenvolvimentu lokal hodi promete osan hamutuk US$100.000 ba hadia makina agríkola sira neebe esensial.
Liu husi kordenasaun ho Primeiru Ministru no IX Governu, inisiativa nee viza atu restaura fali trator sira ba komunidade, hodi hamenus kusta operasional ba agrikultor lokal sira husi US$ 20 ba deit US$ 5 kada oras.
Prezidente enfatiza katak revitalizasaun sektor agríkola nee vital tebes ba hadia moris iha area rural no fo apoiu ba família serbisu-nain sira iha rejiaun nee.
Koalia ba estudante sira, Xefe Estadu anunsia oportunidade internasional oioin, inklui bolsa estudu 30 ba Holanda no programa espesializadu iha Universidade Taylor iha Malazia.
Prezidente mos husu foin-sae Maliana sira atu foka liu ba area Siensia, Teknolojia, Enjenaria no Matematika (STEM), inklui mos lian sira hanesan Ingles no Mandarim. Prezidente sublina katak maske siensia sosial sira iha valor, dezenvolvimentu nasaun nian iha futuru depende ba espesialidade teknika iha area hanesan Medisina, Dijitalizasaun, no Inteligensia Artifisial (AI) hodi harii Estadu ida neebe modernu no kompetitivu.
Refleta mos kona-ba progresu Timor-Leste nian dezde independensia, Prezidente Ramos-Horta nota kresimentu signifikativu iha sektor saude, neebe aumenta husi mediku nain 21 deit iha 2002 ba mediku nain 1.400 resin ohin loron. Xefe Estadu mos bolu atensaun ba esforsu nasional atu fo kompensasaun no valor diak liutan ba mestre sira, tanba sira-nia papel fundamental ba kualidade moris nasional.
Vizita nee remata ho foku ba sustentalibilidade, iha neebe Prezidente esplika detallu kona-ba projetu infraestrutura verde foun iha Dili neebe sei fornese uma-hela modernu ba estudante feto sira husi area rural neebe foka ba area STEM, hodi garante katak jerasaun lider Timoroan tuirmai prontu ona ba dezafiu sira aban nian.
(eme)
