DILI, STLTIMORLESTE.com – Kondutor Mikrolet transporte publiku iha sidade Dili preokupa ho presu mina folin sae too US$ 1.50 kada litru ida, tanba nee husu ba governu liu husi Ministeriu Transporte no Komunikasaun (MTK) atu aplika ona tarifa transporte nian ba estudante ho presu 25 sentavus, karik sei nafatin ho tarifa 15 sentavus, susar tebes atu taka kustu mina nia folin, tanba daudaun nee movimentu ema mos komesa menus.
Preokupasaun nee hatoo husi Ricardo dos Santos nuudar kondutor Mikrolet 05, halai ba Diresaun Caicoli, Bairo Pite-Manleuana ba STL iha eis Merkadu Tuan Caicoli Dili, Kinta (09/04/2026).
Nia dehan, daudaun nee mina folin sae, movimentu ema mos menus, difisil loos ba sira atu hetan osan.
“Ami sente triste tanba mina folin sae makaas tebes, agora litru ida folin US$ 1.50 no estudante sira kontinua selu estandar governu nian mak 15 sentavus, balun selu deit 0.20 sentavus, halai loron ida dala ruma hetan US$ 40, osan nee tenke ense mina US$ 20, setor deit US$ 20 ba patraun.
Rendimentu ida nee la hanesan uluk mina folin seidauk sae, ami ense deit US$ 15.00 ou US$ 17.00, bele haleu sidade Dili too kalan, agora ense mina US$ 20 ba leten foin nakonu. Hau senti la satisfas ho rendimentu ida agora nee no pasajeirus sira agora mos la hanesan uluk, menus liu, neebe ami atu hetan rendimentu mos araska,” dehan Kondutor Mikrolet, Ricardo.
Iha biban nee nia rekomenda ba governu liu husi MTK atu hasae tarifa ba estudante sira, kada ema ida selu 25 sentavus hanesan ho inan aman sira neebe utiliza mikrolet movimentu iha sidade Dili, karik bele mos governu fo subsidiu ho kupon mina.
“Ami hanoin governu bele fo subsidiu mai ami ho kupon mina, ida nee ami la ejize maibe nee depende ba governu, sei iha hanoin ba povu ninia preokupasaun,” Ricardio akresenta.
Iha biban nee, kondutor Microlet 01, Caicoli-Becora, Marciano Soares konfesa katak, nuudar kondutor senti triste tanba agora mina folin sae, pasajeirus sira sei mantein selu hanesan uluk mak 15 sentavus, ida nee araska ba sira nia rendimentu.
“Estudante sira kontinua selu ho tarifa 15 sentavus, ida nee halo ami araska, husu ba pasajeirus hotu tenke komprende konaba mina folin sae, sira tenke selu 25 sentavus, atu ami mos bele hetan rendimentu oituan. Iha sidade Dili movimentu lao hanesan babain, ami preokupa liu mak mina, agora folin sae ona ba US$ 1.50 kada litru ida, ami husu ba Governu atu tau matan ba problema mina folin nee, tenke aplika tarifa sae oituan. Espera iha semana ida ka semana oin mina folin bele tun ona,” dehan kondutor Marciano Soares.
Sentimentu triste hatoo mos husi Estudante, Zelia Paixao katak, daudaun nee bainhira atu sae mikrolet, dala ruma kondutor sira husu kedan, sei selu tarifa 25 sentavus bele sae, sei selu 15 sentavus diak liu lalika sae tanba mina folin sae.
“Ami senti triste tanba ami nuudar estudante, baibain sae mikrolet iha sidade Dili selu deit 15 sentavus, agora tenke selu 25 sentavus, ida nee halo ami la konfortavel, ami rekomenda ba governu atu tau atensaun ba folin mina.
(jos/EST02)
