DILI, STLTIMORLESTE.com – Diretor Ezekutivu Empreza Aero Dili, Lourenço de Oliveira hatete, Aero Dili sei taka voo Timor Leste ba Singapura – Fuzhou, tanba impkatu husi funu iha Mediu Oriente.
Haree ba situasaun funu iha Mediu Oriente, Diretor Ezekutivu Empreza Aero Dili, Lourenço de Oliveira halo audensia ho Prezidente Republika Jose Ramos Horta hodi rona esplikasaun kona-ba situasaun aero Timor Leste nian liga ho krize kombustivel neebe kauza husi funu Mediu Oriente entre Amerika ho nia aliadu Israel hasoru Iraun.
Durante audensia, Emprezariu Lourenço informa ba Xefe Estadu katak, nuudar Empreza Aero sei taka voo Aero Dili husi Timor Leste ba Singapura inklui Dili ba Fuzhou (Xina), depois sei kontinua hafoin situasaun normal.
Lourenço esplika tan katak, voo balu sei diminui nia rute husi semana ida dala rua ka tolu, sei diminui ba loron ida deit iha semana ida nia laran, hanesan Malazia no Xina. Maibe ba Indonezia sei haree mos ba situasaun krize kombustivel. Kona-ba bilhete, emprezariu nee informa, folin sae ona tuir situasaun mundial, liu-liu liga ho avtur nia folin neebe sae ona ba 90% dezde Marsu 2026 no situasaun refere enfrenta iha mundu tomak, laos deit iha Timor Leste deit. Husi problema ida nee, Aero Dili sei la hamenus nia funsionariu sira, kompara ho kompanhia Aero iha mundu neebe hamenus daudaun ona sira-nia funsionariu.
“Hau tenkeser taka rute balun hanesan Singapura hapara lai haree situasaun normal mak semo fali Fuzhou (Xina), sei taka iha fatin balun mos hau diminui, tuir lo-loos hau bele ba dala tolu dala haat hau ba deit dala ida porkue hau ba bebeik mina karun bilhete karun pasajeiru mos laiha para bele sae aviaun, entaun kustu aviaun nee karun liu neebe hau halo hela aprezentasaun ba senhor Prezidente,” dehan Lourenco ba jornalista sira iha Palasiu Prezidensial Kinta 09/04/2026.
Nia hatutan, sei hapara nasaun rua maibe nasaun seluk diminui Flagh hanesan durante nee semo dala tolu diminui ba dala ida, no hapara nasaun rua hanesan Singapura no Fuzhou.
“Se ita haree deit mina agora sae kuaze 90% konserteza ami sei halo konta hotu too ida neebe mak ami bele hasae masimu ke ami hasae nee 20-30%,” dehan nia.
Iha hasoru malu ho Prezidente husu oinsa mak Governu fo apoiu, no Ministru Transporte no Telkomunikasaun bolu ona nain ba Aero iha 23 hodi halo reuniuan ho primeiru Ministru no membru Governu husi tuku 8 dader too 9 kalan, tuir nia haree Governu hakarak duni suporta empreza nasional tanba nee sira kontente, tanba nee ba oin sei servisu makaas para bele ajuda kontribui ba nasaun.
Fulan ida tim ida mak servisu no tim ida seluk mak servisu hodi halo rotasaun, nunee ema labele lakon empregu no labele lakon moris.
Ikus liu, parte Aero Dili aprezenta mos kona-ba pozisaun Governu atual nian hodi ajuda Aero Dili hanesan empreza Timoroan nian hodi bele kontinua nia operasaun. Nunee, Empreza Aero Dili iha planu atu Governu mos hola parte iha asaun (saham) iha empreza Aero Dili hodi fortifika nia ezistensia.
(eme)
