DILI, STLTIMORLESTE.com – Prezidente Republika (PR), Jose Ramos Horta ho Komisaun D iha Parlamentu Nasional (PN) diskute kona-ba Konselhu Konsultivu Fundu Petroliferu.
Iha loron kinta (09/04/2026) Prezidente Republika, Jose Ramos Horta simu Vise Prezidente Komisaun D Parlamentu Nasional, Manuel Henrique Noronha, ho delegasaun iha Palasiu Prezidensial Nicolau Lobato hodi deskute konaba Konselhu Konsultivu Fundu Petroliferu.
Iha hasoru malu nee Enkontru foka liu-liu ba proposta terseira alterasaun ba Lei Nu. 2/2017 kona-ba Organizasaun no Funsionamentu Administrasaun Parlamentar.
Audiensia nee parte ida hosi prosesu konsultasaun neebe luan hosi Komisaun atu hetan hanoin hosi lideransa Estadu atual no pasadu sira kona-ba reforma lejizlativa neebe fo impaktu ba orgaun fiskalizasaun nasional sira.
Topiku sentral hosi diskusaun nee mak kona-ba futuru Konsellu Konsultivu Fundu Petrolíferu nian, neebe la ativu ona iha tinan hirak ikus nee. Maske Komisaun nee foti hela opsaun sira atu halakon ka halo reforma ba orgaun nee, Prezidente Ramos Horta defende atu mantein Konsellu nee liu hosi mudansa estratejika iha nia kompozisaun.
“Hanesan horseik mos ita hetan informasaun diak husi Eis Primeiru Ministru, Marí Alkatiri opiniaun la dook malu ho ita nia Prezidente Republika atual fo hanoin mos katak, Konsellu Konsultivu ida nee bele ka labele halakon, ita muda deit nia maneira oinsa mak atu bele asegura konsellu ida-nee ho diak,” Visi Prezidente.
Iha hasoru nee Prezidente Republika Jose Ramos Horta sujere katak Konsellu nee tenke revitaliza liuhosi rekrutamentu ba espesialista tekniku sira neebe kualifikadu tebes no iha esperiensia barak. Espesialista sira-nee sei halo koordenasaun ho eis-titular sira atu nunee bele fo apoiu neebe forte no la-polítiku, hodi asegura jestaun efektivu ba riku-soin petrolíferu nasaun nian.
Vise Prezidente Noronha hatete katak Prezidente nia hanoin sira nee lao hamutuk ho nesesidade atu iha mekanizmu fiskalizasaun neebe funsional liutan no bazeia ba matenek espesialista sira-nian.
Prezidente enfatiza katak maske desizaun lejizlativa final iha Parlamentu Nasional nia liman, reforma naran deit tenke asegura katak Konsellu nee livre hosi interferensia polítika.
Enkontru nee halao hafoin konsultasaun ho lider pasadu sira hanesan Mari Alkatiri no Taur Matan Ruak, no Komisaun D planeia ona atu kontinua sira-nia dialogu ho atual Primeiru-Ministru, Xanana Gusmão no eis-Prezidente, Francisco Guterres Lu-Olo atu alkansa konsensu nasional ida kona-ba kestaun nee.
(eme)
