DILI, STLTIMORLESTE.com – Posibilidade iha futuru Ministeriu Edukasaun bele fasilita formasaun ba profesór sira husi Eskola Teknika Vokasional (ETV).
Liafuan nee haktuir husi Ministra Edukasaun, Dulce de Jesus Soares, bainhira halo diskusaun kona-ba formasaun ba profesór sira husi Ensinu Sekundariu Tekniku Vokasional ho Asesor Espesial Prezidente Repúblika ba Komersiu no Investimentu Internasional, Peter R. Thompson iha sala VIP Ministeriu Edukasaun Vila Verde, Kinta (09/04/2026).
Depois remata diskusaun Ministra Edukasaun, Dulce de Jesus Soares hatete, enkontru ho reprezentante Prezidente Republika nian hodi halo diskusaun no esplora posibilidade atu halo kooperasaun iha area formasaun ba eskola tekniku vokasional.
“Ohin ami koalia katak posibilidade iha futuru atu bele fasilita formasaun ba ita nia profesor sira husi eskola teknika vokasionál”, dehan Ministra Dulce liu husi pajina rede sosial ME neebe STL asesu Sesta (10/04/2026).
Governante nee argumenta, agora daudaun foin mak esplora hanoin sira no ME sei halo planu hodi haree oinsa mak bele fó formasaun ba profesor sira.
Entretantu Assesor Espesial Prezidente Repúblika ba Komérsiu no Investimentu Internasional, Peter R. Thompson aprofunda, mai iha nee atu haree posibilidade hodi bele fasilita formasaun ba profesór sira husi eskola teknika vokasional.
Iha sorin seluk, Profesor Eskola Tekniku, Raimundo Soares hatete, nuudar profesor sente kontenti bainhira governu liu husi ME atu fasilita formasaun ba sira, tanba liu husi formasaun sira neebe iha bele aumenta sira nia kapasidade no konhesimentu.
“Hau kontenti tebes bainhira governu fo oportunidade ba profesor sira husi eskola tekniku vokasional tuir formasaun. Tanba liu husi formasaun sira ita bele iha konhesimentu neebe klean liu tan,” dehan nia.
Nia hatutan, espera ida nee labele planu deit maibe futuru presiza duni formasaun ba profesor sira husi eskola tekniku vokasional sira.
(dom)
