DILI, STLTIMORLESTE.com – Governu Japaun halo ona konstrusaun 50 resin ba eskola sira no haruka foinsae Japanezes sira hodi ajuda hanorin, liu-liu iha materia matematika no edukasaun fízika, no projetu sira nee sei kontinua nafatin, iha tempu badak mos sei implementa programa apoiu foos ba merenda eskolar iha Ministeriu Edukasaun.
Liafuan nee haktuir husi Embaixador Japaun nian ba Republika Demokratika Timor Leste, Yamamoto Yasushi, bainhira halao vizita kortezia ba Ministra Edukasaun, Dulce de Jesus Soares, iha Vila Verde ,Dili, Kinta (09/04/2026).
Hafoin diskusaun, Yamamoto Yasushi hateten, kontente tebes vizita Ministra hodi diskute kona-ba asuntu lubuk relasiona ho edukasaun no projetu sira neebe implementa ona liu husi suporta Governu Japaun nian no bele rona mos difikuldade sira neebe parte edukasaun hasoru no hein katak bele servisu hamutuk.
“Hau kontente tebes mai vizita Ministra nia fatin no durante enkontru ami halo diskusaun diak tebes kona-ba asuntu lubuk ida neebe relasiona ho edukasaun nian, no hau hatoo ba Ministra relasiona ho projetu sira neebe implementa ona liu husi suporta finansiamentu Governu Japaun nian, no hau mos simu ona informasaun husi Ministra relasiona ho difikuldade sira neebe husi parte Edukasaun nian hasoru no hau hein ba oin hau bele servisu hamutuk no besik liu tan ho Timor Leste, liu-liu iha parte edukasaun nian,” dehan Embaxador Japaun liu husi media sosial ME, neebe STL asesu Sesta (10/04/2026).
Nia argumenta, Governu Japaun halao ona konstrusaun 50 resin ba eskola sira no haruka foinsae Japanezes sira hodi ajuda hanorin, liu-liu iha materia Matematika no Edukasaun Fízika, no projetu sira nee sei kontinua nafatin, iha tempu badak mos sei implementa programa apoiu foos ba Merenda Eskolár iha Ministeriu Edukasaun liu husi (WFP) ba eskola 350 neebe lokaliza iha Munisipiu Díli, Lautem, Covalima no Aileu ho total orsamentu US$ 6.000.000.
Aleinde nee Governu Japaun mos oferese bolsu estudu ka (JDS) Japan Development Scholarship ba Timoroan sira hotu iha Ensinu Superiór liu-liu iha área mestrada no ba Funsionáriu Publiku sira maibe infelizmente Governu Japaun seidauk iha bolsu estudu ba iha Nível Ensinu Sekundariu no Governu Japaun iha Timor Leste konsege haruka ona timoroan hamutuk 140 resin mak ba halao estudu iha Japaun.
(dom)
