DILI, STLTIMORLESTE.com – Ministeriu Publiku (MP) reprezenta Prokurador, Pedro Baptista rekere ba Tribunal, atu notifika tan dala ida ba arguidu LM, ba krime Furtu Agravadu, hasoru lezadu SB.
Iha audensia Julgamentu, Tribunal deklara katak arguidu ho ofendidu la marka prezensa iha audensia, tanba nee labele realiza julgamentu, no adia ba loron seluk.
Nune, MP rekere ba Tribunal atu notifika tan dala ida ba arguidu, hodi rona arguidu nia deklarasaun, tanba antes nee Tribunal notifika ona arguidu, maibe la marka prezensa nafatin.
No parte Defeza ba arguidu Defensor Publiku estajiariu, aseita rekerimentu MP nia, atu notifika tan dala ida ba arguidu no bainhira arguidu ho lezadu la marka prezensa mak Tribunal kontinua julgamentu ba oin.
Tribunal deklara katak, halo adiamentu tanba antes nee, arguidu notifikadu ona, maibe nia la konsege marka prezensa, tanba arguidu nia paradeiru no hela fatin iha neebe mos sira la hatene, depois lezadu nia sertidaun mos negativu hotu no to agora la iha informasau.
Tanba nee Tribunal kolektiva deside muda ba loron 17 fulan Novembru tinan 2026.
Tuir akuzasaun katak, iha loron 09. fulan Marsu, tinan 2017 haleu tuku 22h00 iha lezadu nia uma iha Pantai Kelapa, Komoro, Munisipiu Dili.
Iha altura neeba lezadu SB iha hela lezadu nia uma laran tur besik janela uma nian.
Lakleur arguidu kaer ho chave venda hamrik iha lezadu nia janela hun hodi observa situasaun atu tama ba iha lezadu nia uma laran.
Iha altura neeba arguidu atu tama ba iha lezadu nia uma laran hodi bele apropria tiha lezadu nia sasan elektronika no seluk tan.
Maibe antes arguidu atu tama ba iha lezadu nia uma laran, lezadu hare no toman tiha ona arguidu hosi Janela.
Ho nunee maka lezadu kontaktu kedas ba iha nia kolega hafoin liga ba iha Polisia hodi impede tiha arguidu nia konduta nee.
Ho nunee maka lezadu nia kolega ida naran Steward Deans mai hodi kaer tiha arguidu hodi entrega ba iha Polisia.
Konsekuensia hosi arguidu nia konduta nee, rezulta lezadu hetan prejuizu ho valor neebe seidauk apuradu lolos.
Ho faktu sira neebe hakerek ona iha leten, arguidu LM hanesan autor material ho forma tentada, ba krime Furtu Agravadu.
Audensia Julgamentu nee, prezide husi Juiz kolektiva, Ana Paula Fonseca, Ercilia de Jesus, José Maria, Ministeriu Publiku reprezenta husi Prokurador, Pedro Baptista no arguidu hetan asistensia legal husi Defensor Publiku estajiariu nain ida.
(ter)
