DILI, STLTIMORLESTE.com – Irma husi Fraternidade Franciscana da Divina Providencia ou kongregasaun Irmas Franciscana da Divina Providencia neebe halao misaun iha Timor Leste (TL) agradese ba Primeiru Ministru (PM), Kay Rala Xanana Gusmao, tanba konstrui ona refeitoriu iha Sentru Sosial Nossa Senhora de Fatima, Padiae, Rejiaun Adminstrativa Espesial Oecusse-Ambeno (RAEOA) ho misaun mak Lolo Liman hamutuk, Serbisu hamutuk, serbi Uma kreda no povu.
Sentidu agradesimentu nee hatoo husi Vigaria Jeral Kongregrasaun, Irma Ana da Paz Abreu Nunes akompanha husi reprezentante Superiora Jeral iha Timor Leste, Irma Josefina Benevides ba STL hafoin halo audensia ho Xefe Governu, Kay Rala Xanana Gusmao iha Palasiu Governu, Sesta (10/04/2026).
“Ohin ami mai hasoru Ita Nia Primeiru Ministru atu hatoo agradesimentu ba diak tomak neebe halo mai ami, liu-liu ami nia instituisaun Franciscana iha Oecusse, iha fatin neebe ami halibur labarik nain 300, forma Sira Nia Vida Moris Liu husi area Edukasaun,” dehan Irma Ana da Paz Abreu Nunes.
Nia haktuir tan katak, Kongregasaun Irmas Franciscana da Divina Providencia apresia ho Primeiru Ministru, Kay Rala Xanana Gusmao neebe halao knaar ho diak tebes no servisu direta ba povu.
Iha sorumutu nee, Primeiru Ministru mos hatoo agradese ba Irma sira neebe durante nee ho karinhu servisu hodi haree labarik sira iha Oecusse.
Dezde tinan 2002, Fraternidade Franciscana da Divina Providencia tama iha Timor Leste no hala’o misaun iha Oecusse hodi halibur labarik sira iha tinan 2003, oras nee balun hetan ona servisu iha Governu, iha instituisaun privadu sira, no balun sei frekuenta hela estudu iha Universidade.
Durante halao misaun iha Oecusse, kongregasaun hetan mos apoiu husi Governu liu hosi Ministeriu Solidariedade Sosial no Inkluzaun (MSSI) no komunidade Portuges balun iha Timor Leste.
Kongregasaun iha karizma no misaun mak hanesan, sai instrumentu Providencia Divina no Maromak Nia mizerikordia iha servisu sira neebe kiak liu, tulun labarik no foin sae sira neebe família laiha kbiit atu sustenta sira-nia edukasaun.
Iha biban nee, madre reprezentante Superiora Jeral iha Timor-Leste, Irma Josefina Benevide mos hatoo agradese bá Xefe Governu bá buat Diak hotu neebe durante nee o ona ba Kongregasaun Francisca iha TL, Espesial Liu bá Oecusse.
“Hau hakarak agradese bá buat tomak neebe durante nee governu TL Apoiu Mai Ami Nia kongregasaun, ohin Ami hasoru PM Xanana atu komprementa no agradese bá buat tomak neebe oferese ona Mai Ami,” dehan reprezentante Superiora Jeral iha Timor-Leste, Irma Josefina Benevides.
Nia akresenta, tinan oin selebra tinan 25 prezensa kongregasaun franciscana iha TL, tanba nee hakarak hatoo agradese bá governu tanba iha TL Kongregasaun nee la serbisu Mesak, serbisu hamutuk ho Igreja no Governu.
“Ami Mai husi Igreja, Ami bá Igreja no Ami serbii bá Igreja, Ida nee maka Ami Nia misaun iha TL, Lolo Liman bá malu, serbisu hamutuk, Ami Laos serbisu mesak, tanba nee Ami Nia mensajen bá povu TL, Mai Lolo Liman bá malu, servisu hamutuk,” dehan nia.
(jos)
