DILI, STLTIMORLESTE.com – Bainhira atu hasae kualidade iha Ensinu Superior, mak daudaun nee dosentes balun ba iha maestradu no kontinua partisipa iha formasaun ba lingua português.
Afirma Reitor Instituto Ciência Saude (ICS), Leao Borges katak, estudantes idak-idak tenke hakas aan estuda, tanba nee mak dosentes sira nafatin fo trabalhu ba sira, atu nunee hanesan meus ida para estudantes sira buka aprende ho diak liu tan.
“Atu hasae kualidade nee mak agora daudaun dosente sira balun ba iha maestradu, balun partisipa iha formasaun lian português, nee para atu bele hasae kualidade iha Ensinu Superior, depois tuir formasaun pedolojia ninia, tanba pedolojia nee metodu atu hanorin estudantes, dalan seluk mak dosentes nee hatoo deit, oinsa estudantes mak hakaas aan para atu bele hetan valor diak,” dehan Reitor Instituto Ciensia Saude (ICS), Leao Borges ba STL iha nia knaar fatin Segunda nee (13/04/2026).
Entretantu Reitor East Timor Coffee Institute ( ETCI), Mateus Maia de Jesus dehan, ensinu superior sira hakarak ka lakohi presiza aposta ba kualidade, tanba jestaun kada instituisaun husi ensinu superior idak-idak tenke kompete ho universidade husi rai liur.
“Ita nafatin aposta ba kualidade iha ita nian ensinu superior sira iha rai laran, tanba ita tama ona ba iha ASEAN, nee atu kompete ou la kompete, nee jestaun husi kada instituisaun idak-idak nian atu kompete iha universidade sira husi rai liur, tanba tama ona iha ASEAN, nee duni hakarak ka lakohi tenke kompete, nee kestaun idak-idak nian,” nia informa.
Nunee mos Reitor DIT, Salustiano dos Reis Piedade hatete, dosentes husi DIT hamutuk 21 kontinua sira nian estudu iha rai liur, sira nain 17 nee haruka dezde iha tinan 3 tui-tuir malu, maibe tinan nee haruka tan dosente husi enginaria nain 4, jestaun no negósiu nain 1 ba foti programa dotoramentu, nain 4 ba Indonezia no nain 1 ba Malazia.
“Agora daudaun dosentes DIT neebe mak estudu iha rai liur hamutuk 17. Husi 17 nee, nain 3 estuda iha Portugal, nain 4 estuda iha Brazil, nain 10 estuda iha Indonezia. Sira kontinua estudu iha area petroliferu, egosiasaun nomos ba lingua portugues no englesh,” nia esplika.
Nia dehan, MESSK nian preokupasaun ida mak atu dezenvolve diak liu tan lingua português nee, entaun haruka dosentes sira nee balun ba estudu iha lingua português ninia, maibe sira neebe ba Indonezia nee iha area inglês, maibe barak liu mak ba iha lingua português.
“Hau hanoin husi ami nian dosentes 17 nee, iha nain 6 mak hetan bolsu estudu husi FDCH, nain 11 nee ami mak haruka. Nain 6 mak hasai mestradu no nain 11 ba hasai doutoramentu. Normalmente nee ba maestradu nee tinan 2, doutamentu nee masimu tinan 5,” dehan nia.
(jac)
