DILI, STLTIMORLESTE.com – Governu liu husi Ministeriu Finansas daudaun nee halo hela ezersisiu hodi halo preparasaun orsamentu hodi atende ba Krize mundial.
Kestaun nee hatoo husi Ministra Finansas Santina Viegas ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Segunda (13/04/2026).
Daudaun nee ho funu iha Mediu Oriente, Ministeriu Finansas prepara ona orsamentu ba krize mundial ka lae? Hatan ba kestaun nee Ministra hatete, Governu liu husi Ministeriu Finansas haree hela asuntu nee.
“Ami haree hela asuntu iha neeba, besik ami haree hela para Konselhu Ministru fo hela orientasaun ba Ministeriu Finansas atu haree bele aprezenta orsamentu ba halo alterasaun ba tau orsamentu neebe diak,” dehan Ministra.
Orsamentu hira mak Ministeriu Finansas tau hodi asegura ba krize mundial, hatan ba kestaun nee Ministra dehan, agora daudaun seidauk iha informasaun, sei halo ezersisiu.
Aleinde nee, daudaun nee Governu nia politika apoiu Pertamina Internasional no ETO, orsamentu nee husi OJE 2026 ka oinsa, hatan ba kestaun nee Ministra hatete, politika Governu nia entaun orsamentu tenke mai husi orsamentu jeral estadu.
“Neebe agora dekretu neebe iha ezersisiu nee halo hela ezemplu ba ai-haan nian, Ministeriu Agrikultura, MEKAE halo kordenasaun hela, ba mina nia mos halo hela kordenasaun, entaun medidas saida mak Governu tenke halo, ami sei aprezenta orsamentu bai ha parlamentu,” katak nia.
Nia hatete, medida sira nee sei halo hela ezersisiu diak liu, maibe agora daudaun seidauk simu informasaun detalhu kona-ba valor orsamentu nee hira no alterasaun nee nusa, ministeriu ida idak haree detalhu dadus atu nunee bele fornese, ministeriu Finansas haree fila fali preparasaun ba orsamentu refere.
Daudaun nee ezekusaun orsamentu jeral 2026 porsentu hira ona, hatan ba kestaun nee nia hatete normalmente hanesan ema hotu hatene premeiru trimester ezekusaun sempre kiik 25% no prosesu halo akompanhamentu nomos presiza halo alterasaun haree mos akompamentu ba situasaun neebe mak iha.
Agora daudaun nee haree ba situasaun krize mundial neebe iha haree ba aihan nomos mina para oinsa haree ba assuntu nee mak uluk.
(eme/EST)
