DILI, STLTIMORLESTE.com – Sai manorin diak la presiza pozisaun ka kargu boot, maibe hahu husi ema idak-idak nia atitude kiik loron-loron. Bainhira konsege lidera aan rasik ho diak, nia sei bele lidera ema seluk iha eskola, familia nomos komunidade.
Tuir Manorin Nain Fransisca da Costa husi Eskola Katólika Amigos de Jesus katak, sai manorin neebe diak iha eskola no iha sosiedade nia leet la presiza pozisaun ka kargu boot maibe importante liu mak husi hahalok ka attitude kiik sira neebe halao iha moris loron-loron. Bainhira konsege lidera aan rasik diak ho hahalok kiik sira nee sei bele lidera ema seluk hanesan iha eskola, familia no komunidade.
“Hau hanoin sai manorin neebe diak nee lapresiza kargu ka pozisaun boot ruma, maibe importante mak husi hahalok kiik sira hanesan servisu ho responsabilidade iha eskola, familia no komunidade. Respeita manorin sira seluk, aprende rona no simu ema seluk nia ideias, auda no tulun manorin sira seluk neebe presiza ita nia tulun,” dehan nia bá STL iha Balide, Segunda (13/04/2206).
Nia hatete, sai manorin neebe diak laos deit iha eskola maibe hahu iha familia sai too bá komunidade. Iha uma resiza hatudubrespeita inan no aman sira, rona sira-nia orientasaun no hatudu valor familia. Ajuda halo servisu uma nian no tenke sai ezemplar ba alin sira. Uza linguajen neebe diak halo komunikasaun ho familia sira.
Nunee mos Professor Izolino Guterres husi Eskola Colegio Sao José Operario, liu husi beranda rede sosial, nia parte hakarak partilla lisaun oituan neebe bele ajuda sai manorin ka edukador diak iha ambiente servisu (eskola), familia no komunidade. Iha eskola manorin presiza hatudu ezemplu diak hanesan; pontualidade, estuda ho seriu no halo dever sira ho responsabilidade hanesan manorin. Respeita maluk profesor no kolega servisu sira, aprende rona no simu diferensia ideia husi kolega manorin sira. Iha inisiativa organiza no partisipa iha atividade eskola nian; hanesan grupu estudu, debate ka organizasaun estudantil sira.
Ajuda ka tulun maluk profesor sira neebe hetan difikuldade iha eskola, tanba manorin diak iha eskola mak ema neebe laos deit aprende, maibe ajuda mos ema seluk atu aprende.
Iha familia presiza hatudu respeita ba aman no inan sira, rona sira-nia orientasaun no hatudu valor familia. Toma responsabilidade: ajuda halo servisu uma nian (hanesan hamoos foer, prepara ai-han, haree alin sira). Tenke sai ezemplar ba alin sira, hatudu atitude diak, disiplina no onestidade. Uza linguajen neebe diak bainhira halo komunikasaun ho familia sira, koalia ho respeitu no buka solusaun bainhira iha problema, tanba manorin diak mak ema neebe hamutuk halo familia sai forte no harmoniozu.
Iha Komunidade presiza kontribui no partisipa iha atividade komunidade nian hanesan limpeza, reuniaun ka eventu sosial sira.
“Servisu voluntariu hodi ajuda ema neebe presiza ita-nia tulun, respeita lei no kultura, tuir regra no valor tradisaun. Sai ponte solusaun, ajuda rezolve konflitu ho pasiensia no sabedoria, tanba manorin diak mak ema neebe servi ema seluk ho domin, laos buka interese ba ita nia-an rasik,” dehan nia.
Nia afirma, tenke iha onestidade no sempre hatete lialoos. Responsabilidade hodi halo knaar too remata. Empatia hodi kompriende ema seluk nia sentimentu. Disiplina, kontrola an no uza tempu ho matenek. Iha korajen atu foti desizaun loos ba komunidade nia diak.
Nia hatutan, husi hahalok kiik sira bele sai matadalan bá edukador neebe iha eskola, familia no komunidade. Tanba atu sai manorin diak la presiza pozisaun ka kargu boot, maibe hahu husi ema idak-idak nia atitude kiik loron-loron. Bainhira konsege lidera an rasik ho diak, nia sei bele lidera ema seluk iha eskola, familia nomos komunidade.
(dom)
