DILI, STLTIMORLESTE.com – Ministeriu Edukasaun (ME) liu husi Inspetores sira halao monitoring ba ezame primeiru periodu iha eskola sira Munisipiu Dili lao ho diak too remata.
Tuir Superintendente Edukasaun Munisípiu Dili, Cesarina C. Guterres ba STL iha nia knaar fatin Tersa nee (14/04/2026).
“Hau hanoin kona-ba ezame primeiru periodu neebe halao iha loron Tersa nee lao diak too remata, prezensa estudantes lao diak, monitoring ba ezame nee halao husi ita nian Inspetores sira ba iha ita nian eskola sira iha Munisípiu Dili,” dehan nia.
Nia hatutan, kona-ba sala no fasilidade hanesan meza no kadeira ba iha ezame ninia nee sufisiente ba estudantes sira, tanba nee ezame neebe halao ona nee lao diak hanesan baibain too remata.
Iha parte seluk, Diretor Eskola Sekundariu Nobel da Paz, Jeremias P. de Jesus dehan, estudantes ensinu baziku husi Nobel 300 resin mak tuir ezame, Sekundariu 995 mak partisipa iha ezame, husi ensinu rua nee estudantes 25 mak la tuir ezame, nee tanba sira la rejístu naran no Segunda sira mai fali eskola rejistu, atu nunee bele partisipa hikas iha ezame.
“Ohin nee hanesan loron ikus ba ami nian estudantes hirak neebe mak partisipa ona iha ezame primeiru periodu ninia, maibe ba ami nian estudantes neebe la konsege tuir ezame nee Segunda mak sira komesa ezame fali, pursentu 95 nee ami nian estudantes partisipa hotu ezame no pursentu 5 Mak estudantes balun falta, maibe ami husu ba ita nian estudantes sira bele tuir fali ezame iha loron Segunda,” dehan nia.
(jac)
