DILI, STLTIMORLESTE.com – Inspetor eskolar husi nivel Ensinu Sekundariu Jeral no Ensinu Tekniku Vokasional iha Munisípiu Ainaro tama ona ba idade reforma.
Haktuir Diretor Servisu Edukasaun Munisípiu Ainaro, Patricio da Costa Magno ba STL liu husi telefone, Kuarta nee (15/04/2026).
“Ami nian inspetor eskolar iha nivel ensinu baziku nee iha nain 5, sira nain 5 nee iha kedas ona transporte hanesan motor nee iha ona, atu nunee sira bele halo sira nian servisu hanesan monitoring ba ita nian eskola sira, inspetor ensinu pre eskolar nain 2 mos iha ona transporte atu halo servisu, neebe sira nian servisu lao normal hanesan baibain, halo monitoring ba ita nian eskola sira,” nia haktuir.
Tuir Patricio katak, inspetor ba Ensinu Sekundariu no Ensinu Tekvo ninia nee tama reforma tiha ona, pedidu hatama ona ba iha ME nasional, maibe too agora ninia rezultadu seidauk iha, inspetor nee reforma iha fulan Janeiru tinan ida nee, tanba nee husi SEM Ainaro haruka ona pedidu ba ME no hein deit ninia rezultadu husi Ministériu, tanba too agora seidauk iha rezultadu husi ME.
“Agora daudaun provizoriu ba ita nian ensinu sekundariu no tekvo seidauk iha inspetor neebe atu halo monitoring ba nibel eskola rua neebe ohin hau mensiona nee, ami nian inspetor ba pre eskolar no ensinu baziku nee sira nian transporte iha hela, para sira bele halo servisu,” tenik nia.
Iha fatin seluk, Diretor Servisu Edukasaun Munisípiu Likisa, Julio da Silva hatete, inspetor eskolar sira iha Munisípiu Likisa kada loron sira halao atividades lao diak hanesan baibain, tanba sira iha transporte neebe atu bele fasilita sira nian servisu liu husi monitoring neebe sira halao iha eskola sira.
“Hau hanoin ami nian inspetor eskolar sira iha Munisípiu Likisa kada loron sira halao atividades lao diak hanesan baibain, tanba sira iha transporte neebe atu bele fasilita sira nian servisu liu husi monitoring neebe sira halao iha eskola sira,” katak nia.
(jac)
