DILI, STLTIMORLESTE.com – Eskola Hotelaria no Turizmu Bekora seidauk simu konsesaun eskolar, maibe karik Ministeriu Edukasaun atribui mak eskola sei tau prioridade ba administrasaun eskola no atividades pratika nian ba estudantes sira.
Kestaun nee hatoo husi Diretor Eskola Hotelaria no Turizmu Bekora, Charles F. Guterres ba STL iha nia knaar fatin, Kuarta nee (15/04/2026).
“Kona-ba konsesaun eskolar nee too agora ami seidauk simu osan ida nee, maibe bainhira husi ME atribui ba ami mak ami sei tau prioridade ba iha administrasaun eskola, no atividades pratika nian ba ami nian estudantes sira,” nia afirma.
Tuir nia, konsensaun eskolar ninia montante nee depende ba numeru estudantes neebe mak iha ona, tanba kada estudante US$ 2, ezemplu 350 x US$ 2 x 6 bulan = US$ 4.200, nee duni depende ba numeru estudantes neebe mak iha ona eskola.
Iha fatin seluk, Diretor Eskola Sekundariu 10 Dezembru Komoro, Manuel Verdial hatete, sala tolu neebe agora daudaun ensinu baziku sira uza ba merenda nee tolu, hein deit osan konsesaun eskolar nee mai para pinta, hadia odamatan tolu, no hodi hadia sala de aula ualu fila fali, tolu EBC uza, sira reabilita lima, hamutuk ho neen nee mak sala hamutuk 34.
“Ami iha tinan ida nee ami sei iha 52 mai kraik, nee ami nian estudantes kada sala, tanba nee ho restu ida 52 nee ami sei halo analiza diak ida, hodi haree iha futuru ho osan neebe mak agora daudaun konsesaun eskolar nee ami foti hira atu prepara hanesan foin daudaun liu ba nee, ita prepara ona sala ualu neebe aat tebe-tebes, ita lori kalen taka sala rua, kalen dodok aat, udan tama laran ema la uza, ita bele uza sala rua nee taka ho kalen tau fali arus,” dehan nia.
Nunee mos Diretor Eskola Sekundáriu Jeral nu. 4 Setembru Balide, Sergio A. da Cruz dehan, konsesaun eskolar nee seidauk tama, maibe bainhira tama, eskola sei uza tuir nesesidade eskola nian, haree ba kondisaun infransturtura eskola inklui sala aprendizajen.
“Hau hanoin kona-ba konsesaun eskolar nee seidauk tama, maibe bainhira tama, eskola sei uza tuir nesesidade eskola nian, haree ba kondisaun infraestrutura eskola inklui sala aprendizajen ba ita nian estudantes sira,” nia esplika.
(jac)
