DILI, STLTIMORLESTE.com – Asina Momerandum of Understanding (MoU) entre KOICA, World Food Programme (WFP) no Ministeriu Finansas fo benefísiu ba edukasaun no estudante sira.
Iha 14 Abríl 2026, Ministra Edukasaun, Dulce de Jesus Soares partisipa serimonia Asina MoU entre KOICA, WFP no Ministeriu Finansas Timor Leste iha Aitarak-Laran.
Liu husi diskursu Ministra hatete, iha nee atu asiste fali MoU ida tan neebe sei asina entre KOICA, WFP no MF neebe fo benefísiu ba edukasaun no estudante sira.
“Iha fulan Marsu tinan kotuk hau tuir serimonia neebe WFP entrega dapur eskola nian hanesan parte ida husi programa Say No to 5S, neebe hetan finansiamentu husi KOICA no implementa husi WHO no WFP. Iha tempu neeba, hau husu atu dapur furak sira nee fo mós ba eskola sira seluk. Diak, parese katak ha’u nia orasaun sira hetan resposta tanba ohin hau iha nee iha serimonia asinatura nian atu aprova projetu ida iha neebe sei fó tan dapur 30 ba ita-nia eskola sira,” tenik Dulce iha pajina media sosial ME neebe STL asesu Kuarta (15/04/2026).
Governante nee esplika, programa ida nee mos iha benefísiu potensiál adisional balu ba estudante sira. Ida mak kona-ba formasaun ba estensionista sira. Iha kurríkulu mós iha bloku jardín eskolár iha matéria arte no kultura.
“Se iha estensionista barak liután neebe serbisu iha ita-nia eskola sira, ida nee signifika katak sira bele fó sira-nia tempu balun hodi ajuda dezenvolve ita-nia jardín eskolár sira, hanesan intensaun orijinal. Ami mós iha kampaña ida atu enkoraja eskola sira atu fornese variedade barak liután iha programa estrakurikular sira neebe sira oferese, nunee apoiu ba Klube Eskolár sira Edukasaun Nutrisaun nian maka buat ida neebe bele ajuda duni atu orienta ami nia estudante sira balun ba kareira sira iha futuru iha area nutrisaun nian,” nia tenik.
Nia hatutan, Ministériu dezenvolve hela sistema EMIS foun ida no sei importante atu servisu hamutuk hodi asegura katak plataforma neebe dezenvolve hela iha liña ho nia sistema.
“Hau sei husik ba WFP atu halo ligasaun ho ita-nia unidade IT atu asegura katak plataforma sira-nee kompativel,” dehan nia.
Prtsiipa iha serimonia importante Ministra Finansas Santina J. R. F. Viegas Cardoso, Diretora KOICA iha TL, Youn Hwa Kang, Diretora nasaun nian WFP, nomos reprezentante sira husi KOICA, WFP, Ministeriu Finansas no Ministeriu Edukasaun.
(dom)
