DILI, STLTIMORLESTE.com – Prezidente Republika (PR), Jose Ramos Horta husu Primeiru Ministru (PM), Kay Rala Xanana Gusmão atu hatama autor neebe hatama osan falsu mai Timor Leste (TL), labele detein deit 72 oras hasai fali rai liur.
Kestaun nee hatoo husi Primeiru Ministru Kay Rala Xanana Gusmao ba Jornalista bainhira remata halo enkontru enkontru semanal ho Prezidente Republika Jose Ramos Horta iha Palasiu Prezidensial Nicolau Lobato Bairo Pite, Kinta (16/04/2026).
Primeiru Ministru hatete, horiseik depois de Konselhu Ministru sai iha Whatcap iha osan falsu, tanba nee Primeiru Ministru ba too direita iha fatin neebe rai osan falsu ba nomos ba fali polisia hodi rona informasaun ruma.
“Hau ba fali polisia sira konta hela, relatoriu husi polisia seidauk too mai hau mais relatoriu liu deit mak ema ida ba iha loja ida iha Pantai Kelapa Sentru ba sosa sasan iha loja haree katak osan falsu, nee mak loja nee dehan ba banku central dehan ba Polisia ho Ministeriu Públiku sira la hatene los atu ba neebe mais CCTV haree hela ema nee sai tama iha nia kareta neebe sira ba too iha uma iha Bidau Masaur neeba, ba iha neeba ho ordem atu ba investiga halo asaun,” katak Primeiru Ministru.
Primeiru Ministru hatete, bainhira sira too ema nee nia fatin haree osan barak mak falsu no daudaun nee kazu nee iha ona polisia nia liman, no Primeiru Ministru ba observa membru Polisia sira konta hela osan falsu nee 4 milhoesn. PM seidauk hatene lo-loos maibe iha sei simu relatoriu.
“Neebe informa ba Prezidente no prezidente dehan favor fo hatene ba ita nia instituisaun sira para tau kedas nia iha kadeia neeba, labele halo detensaun 72 oras deit fila ona buat sira nee mais ida nee mak problema boot Prezidente husu mai hau atu fo hatene ba publiku apresia tebes asaun neebe ita nia polisia nia ita nia instituisaun sira seluk halao agora invetigasaun nemak tenke metin klean para hatene buat nee mai ho saida,” dehan PM Xanana.
Primeiru Ministru hatete, bainhira haree imformasaun Polisia kaer ema neebe lori osan falsu, Primeiru Ministru tun direita hodi haree direita osan sai iha kaisa kiik, no kada kaisa ida rai osan 30 mil, signifika katak osan boot tebes no tenke identifika osan nee mai husi neebe.
“Tenke identifika osan nee mai husi neebe, hodi bolu atensaun se mai husi Tibar entau iha tibar tenke responsabliza bolu atensaun tanba sa imi husik buat nee liu, mai los husi neebe ida nee hotu mak investiga hela tanba hau ba tiha ona tibar haree buat nee kapaas tamas ai no saida mak iha kontetor nia laran ita bele haree,” katak PM.
Xefe Governu haree fatin hatama sasan iha Tibar bele detekta sasan neebe tama sai maibe tanba saida mak osan iha fo liu deit tama.
PM hatete, polisia servisu diak ho ministerium publiku serbisu kapaas maibe tenke identifika klaru osan neebe tama husi neebe, tanba ho aviaun labele lori osan barak, osan barak hanesan so tama husi Tibar ou husi rai tanba nee mak investiga nafatin hodi bele hapara tiha problema nee.
Prezidente Republika Jose Ramos Horta sujere atu fo pena todan ba ema neebe involve aan iha falsifika osan falsu.
Prezidente Republika fo parabens ba Ekipa Diresaun Servisu Investigasaun Kriminal husi Polisia Nasional Timor Leste PNTL neebe mak ezekuta mandadu Buska husi Ministeriu Publiku ba armajen Y&W iha bidau hodi hetan osan falsu ho montante milhaun haat resin dolar amerikanu.
Iha loron Kuarta (15/04) Ekipa Diresaun Serbisu Investigasaun Kriminal Husi Polisia Nasional Timor Leste PNTL neebe mak ezekuta mandadu Buska husi Ministeriu Publiku ba armajen Y&W iha bidau hodi hetan osan falsu ho montante millaun haat resin dolar amerikanu.
Mandadu Ministeriu Publiku nia ho numeru uniku krime (Nuc) 0138/26- PNSIC do forsa legal atuasaun Diresaun Serbisu Investigasaun Kriminal Husi Polisia Nasional Timor Leste PNTL hodi detekta duni osan falsu milaun haat resin hatama iha Books neebe tau iha kaixa laran ho brankas lima.
(eme)
