DILI, STLTIMORLESTE.com – Servisu Edukasaun Munisipiu Ainaro haruka ona lista bolsa kandidatu profesores hamutuk 12 ba Ministériu Edukasaun (ME), tanba bolsa kandidatu hirak nee atu muda fatin hanorin husi postu ida ba postu seluk, no balun muda ba munisipiu seluk.
Tuir Servisu Edukasaun Munisípiu Ainaro, Patricio da Costa Magno ba STL liu husi telefone, Kinta nee (16/04/2026).
“Ita nian bolsa kandidatu sira nee atu muda fatin hanorin husi postu ida ba fali postu seluk, tanba nee ami nian dadus nee nain 12, ida seluk muda tiha ona antes, neebe nain 11 nee ida atu muda fali ba munisipiu seluk, nain 10 muda fatin hanorin husi postu ida ba postu seluk, ida mak husi Ainaro atu muda fali ba iha Munisipiu Covalima, ida seluk husi Covalima muda fali mai Munisipiu Ainaro, nee duni bolsa kandidatu hamutuk 12,” nia komenta.
Nia akresenta, lista bolsa kandidatu 12 nee haruka ona ba iha Ministériu Edukasaun, atu nunee bele hetan autorizadaun husi nee ba, nee duni sei hein despaisu husi ME, tanba karta foin haruka iha semana kotuk, tanba nee sei hein despaisu husi ME liu husi parte Rekursu Umanu nasional.
“Ami nian karta nee haruka iha semana kotuk nee, maibe seidauk fo resposta, ita nian bolsa kandidatu 12 nee husi nivel ensinu baziku. Ami nian total bolsa kandidatu iha Munisipiu Ainaro hamutuk 100 ital, nee nivel eskolaridade,” dehan nia.
Nunee mos Miguel Freitas nuudar Diretor Servisu Edukasaun Munisípiu Bobonaro hatete, iha relatóriu laran nee hakerek deit katak, tuir kolokasaun husi Ministériu Edukasaun mai duni iha Munisípiu Bobonaro, maibe sira fila ou muda fatin nee sira la hatene tuir, nee mak lista nee hatama ona ba ME.
“Kona-ba ita nian bolsa kandidatu profesores neebe mak durante nee hanorin iha ita nian eskola nivel ensinu baziku iha Bobonaro, ikus sira muda fali ba fatin seluk, la fo konhesimentu ba ami, tanba nee ami hatoo ona relatóriu ba parte ME nasional, ami hatama iha fulan Marsu nia laran,” nia informa.
(jac)
