DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial AMS, tanba komete krime hasoru lezada AM.
Tuir akuzasaun Ministeriu Publiku katak, iha loron 02 fulan Agostu tinan 2025 iha Bekora Dili, iha oras maizumenus 20h00 kalan, momentu neeba lezada nia kunhadu mak mate, nunee lezada mos tein hela iha dapur, hafoin arguidu AMS mosu mai laiha justifikasaun ruma uza liman hodi basa kedas dala ida iha lezada nia hasan parte los, kauza moras no halo mos lezada tanis iha momentu neeba.
Liu tiha loron sanulu, lezada mos ba halimar iha nia alin nia kost neebe mak lokaliza iha Komoro Dili. Bainhira lezada iha hela kost refere, derepente deit arguidu mos ba tuir iha kost hodi halo kedas agresaun fizika hasoru lezada mak hanesan uza ain hodi tebe dala ida iha lezada nia kabas parte liman nian, kauza moras hafoin arguidu mos ameasa tan lezada, hodi dehan o mangame hau tesi kotu tiha o, nunee halo lezada mos tauk ba hatoo kedas keixa iha Polisia.
Konsekuensia husi arguidu nia hahalok nee mak halo lezada sinte moras iha hasan no kabas, tanba hetan tebe no basa ho liman husi arguidu, hafoin ameasa ho lia fuan atu tesi kotu tiha lezada, nunee halo lezada mos tauk no lezada mos hetan tratamentu iha Sentru Saude.
Arguidu halo ho forma livre, deliberada no konsiente, hatene momos (ben sabendo) katak, uza ain hodi tebe, liman hodi basa bele kauza moras, no ameasa atu tesi kotu lezada halo lezada mos tauk, maibe arguidu halo nafatin nia hahalok nee, hanesan meius ou instrumentu ida neebe mak apto no adekuada.
Arguidu mos hatene hela katak, nia hahalok sira nee proibidu tuir lei penal, tanba nee arguidu AMA hanesan autor material ba pratika Krime rua, ofensas ba integridade fizika simples, tuir artigu 145 husi Kodigu Penal, ho forma Violensia Domestika no krime ameasa.
Depois Juiz prosesu lee tiha akuzasaun neebe iha, ba krime Ameasa liu husi tentativa konsiliasaun, lezada aseita atu dada fila. Tanba nee Tribunal deside hodi omologa tiha.
Kona-ba faktus neebe iha, arguidu deklara katak basa duni lezada, tanba emosaun. Arguidu deklara depois akontese ida nee too mai agora la iha tan problema ona, sira diak malu no kontinua moris hamutuk.
Arguidu mos arepende ba nia hahalok nee, promete sei la halo tan aktu nee iha futuru.
Lezada mos haforsa tan akuzasaun neebe iha katak, arguidu halo duni agresaun hasoru lezada, maibe agora sira diak malu ona. Hahu husi problema mosu too mai agora la iha tan problema ona.
Rona tiha deklarasaun lezada no arguidu, Tribunal husu atu tama ba iha alegasaun.
Iha alegasaun Prokurador Hernani Rangel husu Tribunal atu aplika pena multa ba arguidu. Enkuantu parte defeza, Laura Valente husu Tribunal aplika pena multa neebe kmaan, tanba sira diak malu ona.
Rona tiha alegasaun, Tribunal adia ba loron seluk hodi rona desizaun.
Audiensia julgamentu nee prezide husi Juiz Singular José Gonçalves, Ministeriu Publiku reprezenta husi Prokurador Hernani Rangel, arguidu hetan asistensia legal husi Defesora Públika Laura Valente.
(ter)
