DILI, STLTIMORLESTE.com – Primeiru Ministru (PM), Kay Rala Xanana Gusmão hatete, la nomeia ema husi munisipiu seluk hodi ba lidera ka asume kargu nuudar Prezidente Autoridade Rejiaun Administrativa Espesial Oekusi-Ambeno (RAEOA).
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (16/04/2026).
Antes nee Primeiru Ministru Kay Rala Xanana Gusmão rasik hatete katak, RAEOA sei lidera direita husi Oecusse oan maibe ikus nee delega fali ema husi munisipiu seluk hanesan Prezidente Interinu nee, hatan ba kestaun nee Primeiru Ministru hatete, se mak dehan nomeia ema husi munisipiu mak lidera.
Se mak dehan atu nomeia fali Prezidente Autoridade RAEOA fatin seluk ba RAEOA. Ita boot rona ona se mak atu ba Prezidente Autoridade RAEOA.
Foin lalais Ministru Administrasaun Estatal (MAE), Tomas Cabral klarifika nomeasaun Diretor Nasional Apoiu Administrasaun Suku (DNAAS), Celestinho Martinho Marques, hanesan interinu atu halo tranzisaun administrativa iha RAEOA, tanba Prezidente Autoridade Rejiaun Administrativa Espesial Oekusi (RAEOA), Regio Servante Romeia da Cruz, daudaun nee kondisaun moras hela.
Tomas Cabral hatete katak, nomeasaun nee laos atu troka Prezidente Autoridade Rejiaun Administrativa Espesial Oekusi, Regio Servante Romeia da Cruz, maibe atu garante kontinuidade servisu governasaun durante períodu tranzisaun.
Tomas Cabral dehan, nia nomeia Diretor Nasional Apoiu Administrasaun Suku, Celestinho Martinho Marques atu organiza estrutura, se lae administrasaun la lao.
Nia esplika katak, tuir lei tutela ba RAEOA la iha Ministeriu Administrasaun Estatal, maibe iha Primeiru Ministru. Nunee, MAE la iha kompetensia atu nomeia ka troka lideransa RAEOA, no medida neebe foti mak deit atu asegura tranzisaun administrativa.
Dekreitu lei numeru 1 ho 2 nee RAEOA tutela ba iha Primeiru Ministru, Kay Rala Xanana Gusmão, maibe PM Xanana delega mai iha MAE tanba estrutura RAEOA hanesan munisípiu. Maibe hau la bele nomeia Prezidente RAEOA maibe hau bele nomeia diretor ida atu halo tranzisaun.
(eme)
One Response
PM sei nomeia nafatin Celestino Marques hodi Asumi kargu PA iha RAEOA hodi hadia serviço Administrativo no identifica problema nebe PA sesante husik hela iha tinan kotuk nian.