DILI, STLTIMORLESTE.com – Lideransa foun Polisia Nasional Timor Leste (PNTL) relata servisu polisia nian liga ho seguransa ba Prezidente Republika (PR), Jose Ramos Horta.
Prezidente Republika, Jose Ramos Horta simu lideransa foun Polísia Nasional Timor-Leste PNTL, Komandante Jeral Afonso dos Santos no Komisaria Asistente Natercia Eufrasia Martins, aprezenta formalmente sira nia ekipa Komando no fo informasaun kompletu kona-ba situasaun seguransa nasional nian hafoin sira-nia nomeasaun foin lalais nee.
Bainhira remata hasoru malu Komando Jeral PNTL Komisariu Asistensia Polisia, Afonso do Santos ba jornalista iha palasiu Sesta (17/04/2026) hatete, ohin mai hasoru malu ho Prezidente Republika Jose Ramos Horta hodi aprezente futuru polisia feto.
“Hau ho segundu Komandante ho hau mai aprezenta atu haree futuru polisia feto sira nia mak nee ona sira seluk laiha ona,” katak Komjer.
Iha audiensia nee, Komandante Afonso dos Santos koalia kona-ba kestaun krítiku sira relasiona ho disiplina instituisional no estatutu investigasaun kriminal neebe lao hela, liuliu kazu sira neebe envolve dokumentu falsu no osan falsu. Nia reafirma fali PNTL nia kompromisu ba transparensia interna no responsabilidade legal, hodi eNfatiza katak envolvimentu membru polísia nian iha atividade kriminal sei enfrenta konsekuensia disiplinar no legal neebe rigorozu atu garante integridade instituisaun nian.
Komisaria Asistente Natercia Martins foti kestaun konaba imperativu hodi moderniza PNTL liuhosi edukasaun no treinamentu teknolojiku avansadu atu kombate ameasa foun sira hanesan krime síber (cybercrime) no fraude online.
Enkontru nee remata ho kompromisu ida-neebe fahe hamutuk atu hametin jerasaun foun ofisial sira-nian no haforsa relasaun entre polísia no komunidade atu garante dame no estabilidade ba tempu naruk ba sidadaun hotu.
(eme)
