DILI, STLTIMORLESTE.com – Prezidente Republika (PR), Jose Ramos Horta hatoo parabens ba Organizasaun Mundial Saude (OMS) neebe selebra aniversariu ba dala 78 no loron mundial saude.
Prezidente Republika Jose Ramos Horta hatoo kestaun nee liu husi diskursu bainhira partisipa iha resepsaun ida hodi selebra Aniversariu ba da-78 Organizasaun Mundial Saude (OMS) no Loron Mundial Saude iha salaun Multi Uzu Bebora Sesta kalan (17/04/2026).
“Hau hatoo hau nia parabens ba OMS, ba nia forsa trabalhu iha mundu tomak. Ba sira neebe servisu iha ami nia leet, saudasaun espesial,” dehan Prezidente Republika Jose Ramos Horta.
Iha loron espesial nee Prezidente Republika, Ramos-Horta, hamutuk ho membru Governu, korpu diplomatiku, no parseiru internasional sira, partisipa iha resepsaun ida hodi selebra Aniversariu ba da-78 Organizasaun Mundial Saude (OMS) no Loron Mundial Saude. Ho tema Hamutuk ba saude. Hamriik ho siensia.
Xefe Estadu hatoo diskursu prinsipal hodi selebra konkista boot Timor-Leste nian, inklui sertifikasaun istoriku foin lalais nee kona-ba eliminasaun malaria no susesu hodi halakon moras lima seluk neebe antes nee sai hanesan ameasa ba saude publika.
Prezidente hatoo agradesimentu klean ba Reprezentante OMS, Arvind Mathur, no ba profisional saude Timoroan nain rihun ba rihun neebe ho sira-nia dedikasaun lori ona nasaun nee besik liutan ba sistema saude neebe reziliente no ekuitativu.
Iha nia diskursu, Prezidente Ramos-Horta enfatiza papel krítiku inovasaun no teknolojia nian hodi moderniza setor mediku iha rai-laran.
Xefe Estadu foti kestaun kona-ba susesu vijilansia moras dijital, estabelesimentu fasilidade produsaun oksijeniu mediku nasional, no potensial telemedisina nian hodi lori kuidadu espesialista ba komunidade remota sira. Prezidente mos fo rekonhecimentu ba Programa Integrado de Saude no inisiativa foin lalais nee nian hanesan rastreiu saude ba labarik eskola hamutuk rihun duzentus sessenta resin no introdusaun vasina HPV, hodi identifika sira nuudar investimentu vital ba kapital umanu no dezenvolvimentu naruk nasaun nian.
Hateke ba oin, Xefe Estadu koalia nakloke kona-ba dezafiu sira neebe sei persistente, hodi husu foku foun hodi hamenus mortalidade inan, kombate estantingu (stunting), no foti medida ba emerjensia saude neebe rezulta husi mudansa klimatika.
Prezidente mos identifika loloos dezinformasaun saude nuudar ameasa neebe hanesan ho moras, hodi husu ba sidadaun sira atu “hamriik ho siensia” hodi proteje integridade informasaun publika.
Nuudar Timor Leste hametin nia pozisaun iha ASEAN, Prezidente Ramos-Horta reafirma katak saude mak kestaun dignidade no responsabilidade nasional, no promete katak Estadu sei kontinua hadia servisu ospital sira hodi garante katak laiha família Timoroan ida mak husik hela iha kotuk.
(eme)
