DILI, STLTIMORLESTE.com – Profesores da turma sira husi eskola Sekundariu Jeral 10 de Dezembru Komoro sei prienxe valor estudantes sira nian ba kaderneta eskolar.
Kestaun nee hatoo husi Diretor ESJ 10 de Dezembru Komoro, Manuel Verdial ba STL iha nia knaar fatin, Segunda nee (20/04/2026).
“Faze sei kurizi hela, depois ami nian data atu distribui kaderneta ba estudantes sira, lo-loos iha dia 18 fulan nee, nee klaru hela, maibe tanba faze nee ita sei presiza, maibe eskola presiza atu haree ba asuntu importante balun hanesan karakter estudantes sira nian, ami fahe kaderneta nee dia 18 Abril, maibe la konsege, tanba nee ami tama fali eskola mak bele fahe kaderneta ba ami nian estudantes sira,” dehan nia.
Nia dehan, materia ezame nian nee kurizi hotu ona, agora iha faze ida neebe halo rekapitulasaun sistema, ida nee hotu mak sei fahe ba profesores da turma sira, remata ida nee profesores sira prienxe valor estudantes sira nian ba iha kaderneta, depois diretor eskola asina.
“Bainhira ami nian estudantes sira tama fali eskola, nee ami bele fahe ona kaderneta nee ba ami nian estudantes sira. Total ami nian estudantes hamutuk rihun ida atus neen haat nolu resin haat, sira nian kaderneta nee ita presiza asina dala tolu, molok fahe ba estudantes sira,” katak nia.
Iha fatin seluk, Diretor Eskola Sekundariu Nobel da Paz, Jeremias P. de Jesus dehan, agora daudaun profesores sira prienxe hela valor estudantes sira nian ba iha kaderneta eskolar, atu nunee bele fahe kaderneta ba estudantes sira.
“Hau hanoin gora daudaun profesores sira prienxe hela valor estudantes sira nian ba iha kaderneta eskolar, atu nunee bele fahe kaderneta ba ita nian estudantes sira,” nia afirma.
(jac)
