DILI, STLTIMORLESTE.com – Ministeriu Edukasaun (ME) kordena ho Ministériu Saude (MS), Ministeriu Administrasaun Estatal (MAE), inklui Koordenador Munisipiu atu kumpri tuir orientasaun manual operasional uza produtu lokal iha merenda eskolar.
“ME nian kordenasaun ho MS, MAE lao diak hela, normalmente ekipa sei reuniaun kada trimestral. Ita halo beibeik koordenasaun ho parte munisipiu sira atu sira kumpri tuir orientasaun manual operasional PME uza 75% produtu lokal,” dehan Belchior Maria Almeida Barros hanesan Xefe Departamentu Programa Merenda Eskolar iha ME ba STL iha nia knaar, Tersa nee (21/04/2026).
Nia akresenta, iha dekretu lei mensiona 75% tenki uza produtu lokal, tanba nee ME nafatin iha lina koordenasaun servisu ho parte relevantes sira, hanesan MAE, MS no Ministériu Agrikultura, ho nunee programa merenda eskolar bele lao ho diak.
Iha fatin seluk, Kordenador Ensinu Baziku Filial (EBF) nu. 5 Komoro, Marcelino Moniz hatete, estudantes husi Ensinu Baziku Filial (EBF) nu. 5 Komoro konsumu aifuan lokal no naan karau iha programa merenda eskolar.
“Implementasaun programa merenda eskolar lao diak hanesan baibain, menu neebe mak eskola uza nee hanesan bai-bain, nee mak uza produtu lokal, hanesan modo tahan, aifuan lokal hanesan pateka, aidila, apel, no ayam potong, sosis, ikan nee la tama iha menu, tanba ami uza deit naan karau,” nia informa.
Nia afirma, nee duni semana ida nia laran sira han deit naan karau, modo tahan no produtu seluk tan, estudantes rihun rua resin mak asesu ba iha programa merenda eskolar, tanba nee kada loron estudantes sira asesu ba iha programa nee ho diak tebes no ema neebe tein ba estudantes sira nee hamutuk nain 10.
“Ami nian estudantes husi eskola ida nee fahe ba iha turnu haat, tanba nee ema neebe tein ba ita nian estudantes sira han nee nain sanulu, ho nunee tein ba estudantes dader meudia no loraik, tanba ita fahe ba iha turnu haat,” nia haktuir.
(jac)
