DILI, STLTIMORLESTE.com – Tinan nee Institutu Superior Cristal (ISC) loke tan fakuldade agrikultura, neebe mak hetan ona lisensa operasional husi Ministériu Ensinu Superior Siensia no Kultura (MESSK).
Lia hirak nee hatoo husi Reitor ISC, Sebastião Pereira ba STL iha nia knaar fatin, Tersa nee (21/04/2026).
“Tinan ida nee ami loke tan fakuldade foun nee mak fakuldade agrikultura, ami loke fakuldade ida nee bele responde nesesidade, liu-liu agrikultura iha TL, hodi suporta hahan sira nee, oinsa mak ita Timor bele dezenvolve ita nian agrikultura, ida nee mos ami halo kooperasaun ho Ministériu Agrikultura hodi bele atende nesesidade sira, liu-liu agrikultura iha ita nian rai nee presiza tebe-tebes, tanba buat hotu-hotu labele importasaun hotu deit, ita mos tenke produs rasik,” dehan nia.
Nia hatete, oinsa mak TL mos bele halo exportasaun ba rai liur, tanba agora daudaun nee kompetisaun, tanba TL tama ona ba ASEAN, nasaun neebe pertensia ASEAN nian mos makaas liu, oinsa mak esforsu aan para universidade neebe loke nee bele tama iha redi ASEAN ninia.
“Ita mos tenke esforsu para bele besik oituan ho universidade neebe dezenvolvidu. Nee duni tinan nee ami loke tan fakuldade agrikultura, ami simu tan ona estudantes foun, nee hetan despaisu ministerial, hanesan lisensiamentu operasional, tanba daudaun nee ISC iha fakuldade tolu, eduksaun, saude no agrikultura,” nia esplika.
Iha fatin seluk, Reitor DIT, Salustiano dos Reis Piedade hatete, ba oin iha planu atu loke tan fakuldade foun, ideias ba ida nee iha, maibe ida nee tenke liu husi estudu viabilidade ruma, nee duni ninia prosesu estudu viabilidade nee lao hela.
“Daudaun nee ami nian fakuldade haat mak eziste iha DIT no iha departamentu sanolu resin ida, fakuldade engenery and Cience, iha ninia departamentu tolu nee mak mekanika engenerin, civil enginerin no komputer cience, depois ami nian fakuldade petroleum cience, nee iha departamentu rua, nee mak petroleum management no petroleum engineering, fakuldade turizmu no hospitalidade, nee ami iha hotel management ho tour and travel management, ami nian fakuldade ikus liu mak bisnis and management, ami iha departamentu tolu, jestaun finansas, kontabilidade ho jestaun jeral,” dehan nia.
Nunee mos Reitor Instituto Ciensia Saude (ICS), Leao Borges hatete, ICS loke tan departamentu foun ho naran departamentu saude desportu fisiolojia, neebe mak daudaun nee simu hela estudantes foun, departamentu ida nee foin loke iha tinan ida nee, tanba nee ICS daudaun iha departamentu neen, uluk nee lima, agora aumenta ho ida nee mak neen.
(jac)
