DILI, STLTIMORLESTE.com – Nakukun hafalun hela organizasaun Rezistensia Nasional Estudante Timor Leste (RENETIL), tanba lakon ninia membru diak ida Ministru Ensinu Superior Siensia no Kultura (MESSK), José Honório da Costa Perreira Jerónimo, neebe ohin (21/04) hakotu iis iha Hospital Nasional Guido Valadares (HNGV), tanba hetan atakasaun fuan.
“Hakfodak tebes kolega servisu ida pasa notisia ba hau katak kompanheiru José Honório, militante RENETIL no Ministru Ensino Superior fila hikas ona ba mundu seluk,” Carlos Saky espresa semtimentu tristeza nee liu-husi ninia konta Facebook, Tersa (21/04/2026).
Nia dehan, Timor Leste lakon tan ninia ema diak ida nebe fo ona nia moris ba luta iha dezenvolvimentu rai nee. Nia kontribuisaun sei hela nafatin iha istoria no memoria koletiva.
Carlos Saky mos hatoo nina solidariedade klean ba familia tomak nebe nia husik hela, no mos ba Timor oan sira hotu neebe sente lakon maktoban Ministru José Honoriu.
“Iha momentu susar hanesan nee, ita hamutuk no iha lembransa. Espera katak Kompanheiru José Honório bele hetan fatin hakmatek iha mundu seluk, hamutuk ho kompanheiro sira nebe fila uluk ona. Ba imi hotu neebe uluk tau matan nafatin ba imi nia família no ba Timor Leste neebe imi tuir liberta ho imi nia sakrifisiu boot,” dehan nia
Entretantu maktoban José Honório da Costa Perreira Jerónimo simu pose nuudar Ministru Ensinu Superior Siensia no Kultura (MESSK) husi Prezidente Republika, Jose Ramos Horta, iha loron 1 Julhu 2023.
(alb)
