DILI, STLTIMORLESTE.com – Embaixadora Rezidente Dahuluk Singapura ba Timor Leste (TL) entrega karta kredensia ba Prezidente Republika, Jose Ramos Horta.
Prezidente Republika Ramos Horta ofisialmente simu Karta Kredensial husi Teo Lay Cheng, Embaixadora Estraordinaria no Plenipotensiaria rezidente dahuluk Republika Singapura nian ba Republika Demokratika Timor Leste. Serimonia formal nee halao iha Palasiu Prezidensial Nicolau Lobato.
Bainhira remata Entrega karta kredensial, Sejuina Maria Pereira Gomes ba jornalista sira iha Palasiu Prezidensial, Tersa nee (21/04/2026) hatete, ohin Prezidente Republika Jose Ramos Horta simu karta kredensial husi Embaixadora Rezidente Dahuluk Singapura ba Timor Leste.
“Ohin Embaixadora Teo Lay Cheng hanesan primeiru embaixadora rezidente mai Timor Leste mai entrega nia karta kredensial ba sua exlensia prezidente Republika, antes embaixadora sira mai iha Timor nee Noun Residente neebe embaixadora Teo Lay Cheng nee primeira emabaixadora rezidente neebe koloka mai iha Timor,” dehan Visi Ministra MNEK.
Antes entrega Karta Kredensial Embaixadora Theo Lay aprezenta ba Prezidente Republika katak nia mak dadaun nee asume kargu nuudar Embaixadora Singapura ba Timor Leste.
Remata aprezenta aan Embaixadora entrega kedas Karta Kredensial ba Prezidente Republika Jose Ramos Horta. Remata serimonia entrega Karta Kredensial Prezidente Republika Jose Ramos Horta konvida embaixadora hodi halo Enkontru kortejia oinsa hametin koperasaun rai rua iha futuru.
Embaixadora Teo Lay Cheng nuudar diplomata kareira ida husi Ministeriu Negosiu Estranjeiru (MFA) Singapura nian, ho esperiensia iha kargu importante sira iha rai laran no rai liur. Molok nia destakamentu ba Timor-Leste, nia serbisu nuudar Embaixadora Singapura nian ba Reinu Kamboja hahu husi tinan 2021.
Nia mos nuudar Diretora ba Komunikasaun Estratejika iha MFA. Iha tinan 2017, Sra. Teo harii Diresaun Komunikasaun Estratejika, no tinan ida liutiha, nia lidera kampaña komunikasaun Ministeriu nian durante tinan ida ba Prezidensia Singapura nian iha ASEAN. Notavelmente, nia maka membru ida husi ekipa pioneiru ida iha Misaun Permanente Singapura nian ba ASEAN iha Jakarta, asumi kargu nuudar Adjunta Reprezentante Permanente no Xefe Kanselaria ho titlu Diplomatiku husi Ministra-Konselleira husi tinan 2009 too tinan 2013. Nuudar rekoñesimentu ba ninia kontribuisaun sira ba Funsaun Publika, Embaixadora Teo Lay Cheng atribui ho Medalla Administrasaun Publika (Bronze) iha tinan 2009.
Iha biban nee Prezidente Ramos-Horta hatoo boas-vindas ho laran-kmanek ba Embaixadora Teo no espresa konfiansa iha ninia abilidade atu haklean liutan relasaun entre nasaun rua nee.
“Ohin loron marka pasu istoriku no signifikativu ida iha amizade entre Timor-Leste no Singapura. Aprezentasaun kredensial husi Embaixadora Teo Lay Cheng, Embaixadora rezidente dahuluk husi Singapura, laos deit formalidade diplomatika ida nee hanesan testemuña ida ba solidariedade neebe boot Singapura hatudu ona ba ita-nia nasaun dezde antes ita-nia renascimento nuudar estadu independente. Husi tempu inisiu sira iha ita-nia luta, liuhusi misaun manutensaun pas, kapasitasaun, no agora investimentu transformativu iha ita-nia ekonomia no povu. Hau fiar katak Embaixadora Teo sei harii iha fundasaun neebe metin nee, no hau hein atu iha kolaborasaun neebe besik liutan ba benefísiu mutuo husi ita-nia povu no estabilidade iha ita-nia rejiaun,” deklara Prezidente J. Ramos-Horta.
Timor Leste nia kompromisu atu servisu besik ho Embaixadora Teo Lay Cheng hodi realiza aspirasaun hamutuk ba rezultadu tanjível. Enkuantu nasaun rua nee haree ba futuru ida ho sira nia relasaun bilateral neebe klean liu, kredensial iha loron ohin sai hanesan símbolu ida ba respeitu mutuo, konfiansa estratejika, no vizaun partillada ba Sudeste Aziatiku ida neebe pasífiku no prosperu.
Serimonia nee marka Prezidenza mos husi Visi Ministra Negosiu Entranjeiru no Koperasaun Sejuina Maria Gomes, Xefe Kasa Sivil, Xefe Kasa Militar, nomos partisipante seluk tan.
(eme/EST 2)
