DILI, STLTIMORLESTE.com – Prezidente Republika (PR), Jose Ramos Horta halo enkontru kortejia ho Embaixadora Estraordinaria no Plenipotensiaria Rezidente Dahuluk Republika Singapura, Teo Lay Cheng, hodi hametin kooperasaun rai rua.
Kestaun nee hatoo husi Visi Ministra Negosiu Estranjeiru no Kooperasaun (MNEK), Sejuina Maria Pereira Gomes ba jornalista sira iha Palasiu Prezidensial Nicolau Lobato, Bairo Pite, Tersa (21/04/2026).
Visi Ministra hatete, durante enkontru Prezidente Republika ho Embaixadora halo diskusaun foka liu ba area kooperasaun bilateral entre Timor Leste ho Singapura iha futuru.
“Prezidente mensiona kona-ba areas de koopreasaun bilateral entre Timor Leste ho Singapura neebe bele dezenvolve diak liu tan balun neebe lao ona balun, ideias foun no embaixadora nee kontenti rona ideias balun husi prezidente no embaixadora sei tur hamutuk parte governu, parte relevante, ministeriu relevante para bele haree oinsa atu bele konkretiza planu sira neebe sira sei dezenvolve hamutuk ho governu Timor Leste no liu-liu embaixadora mais sei hatoo ba iha governu Singapura kona-ba ideias sira neebe ohin prezidente temi,” dehan Visi Ministra.
Durante enkontru liga ho koperasaun karik espesifiku iha area ida neebe? Hatan ba kestaun nee Visi Ministra hatete foka liu ba area Aero nomos formasaun.
“Area kooperasaun, hanesan Aero nian depois formasaun no mos iha area ekonomiku no sosio kultura,” katak Sejuina.
Prezidente Republika Jose Ramos Horta hatete Timor-Leste no Singapura partilla relasaun bilateral neebe metin ho abut iha solidariedade inisial no habelar kooperasaun.
Singapura entre nasaun dahuluk sira neebe estabelese relasaun diplomatiku ho Timor-Leste bainhira hetan nia independensia iha tinan 2002 no kontribui pesoal militar sira ba misaun manutensaun pas ONU nian hafoin referendu iha tinan 1999.
Pasu transformativu ida atinji iha fulan-Abril tinan 2024 ho abertura Embaixada Singapura nian iha Dili, neebe kataliza ona investimentu Singapura nian iha setor krítiku sira hanesan edukasaun, saude, agrikultura, peska, no infraestrutura.
Liu husi Programa Kooperasaun Singapura nian, ofisial Timor-oan liu 1,100 maka simu ona formasaun dezde tinan 2012, hametin liutan husi Pakote eSTARS neebe lansa iha fulan Julhu tinan 2025 hodi apoia Timor Leste nia integrasaun ba ASEAN.
Kooperasaun inklui mos akordu referensia mediku ho Ospital Parkway (neebe renovadu anualmente dezde tinan 2019), Akordu Servisu Aereu atualizadu (2023), investimentu boot sira hanesan Heineken no A-Smart Holdings nia projetu “Timor-Leste Marina Square”, no solidariedade umanitariaEzemplifikada husi esforsu tulun Cruz Vermelha Singapura nian hafoin inundasaun iha fulan-Abril tinan 2021. Parseria duradoura ida-nee reflete kompromisu hamutuk ba estabilidade rejional, prosperidade, no apoiu mutuo iha tempu krize.
(eme)
