DILI, STLTIMORLESTE.com – Prezidente Republika (PR), Jose Ramos Horta sente triste bainhira lakon membru Governu, Ministru Ministru Ensinu Superior, Siensia no Kultura (MESSK), Jose Honorio da Costa Pereira Jeronimo neebe Nai bolu hikas ona iha Nai nia kadunan Santo.
Prezidente Republika Jose Ramos Horta hatoo sentimentu tristeza nee ba jornalista sira iha Farol, Tersa (21/04/2026) hatete, hakfodak simu imformasaun klaru kuandu rona Ministru joven ida derepente iss kotu, Prezidente sente Triste tanba lakon membru Governu diak ida.
Prezidente Republika hatete sente triste tanba lakon Ministru Ensinu Superior, Siensia no Kultura (MESSK), Jose Honorio da Costa Pereira Jeronimo neebe servisu ho dedikasaun tomak iha IX Governu Konstitusional.
“Pesoalmente sente triste tebes kuandru boot ida nee ke Timor Leste lakon iha membru Governu tinan 2 ka 3 liu ba Ministru Justisa, no Ministru ensinu Superior ita haree ema ida laos problema fuan tanba sei klosan hela vontade maibe struk derepente bele akontese, ema ida krekas saude diak, maibe lahatene saida iha laran saida, nee duni triste, no hatoo kondelensia ba familia tomak no hau sei haree Governu saida mak sei halo iha loron sira nee nia laran,” dehan Prezidente Republika.
Ministru Ensinu Superior, Siensia no Kultura, Jose Honorio da Costa Pereira Jerônimo moris iha Bazartete, Munisípiu Likisa, iha loron 15 fulan Fevereiru tinan 1973.
Iha tinan 2001, nia hetan graduasaun iha Estudu Dezenvolvimentu husi Institutu Teknolojia no Siensia Mandala iha Indonezia.
Nia kompleta ninia Mestradu iha Estudu Dezenvolvimentu iha Universidade Kristen Satya Wacana, Salatiga, Indonezia, iha tinan 2010. Hahu tinan 2001, nia hanesan profesor iha Fakuldade Ekonomia, Departamentu Estudu Ekonomia no Dezenvolvimentu, iha Universidade Nasional Timor-Leste (UNTL), universidade publika uniku iha Timor Leste.
Kaer kargu xefia oioin iha UNTL, mak hanesan Xefe Departamentu Ekonomia no Estudu Dezenvolvimentu (2004-2006), Dekanu Fakuldade Ekonomia (2006-2008), Vise-Dekanu Asuntu Estudante iha Fakuldade Ekonomia no Jestaun (2011-2013), Reitor Administrasaun no Finansas (2016-2020) no Pro-Reitor Inspesaun, Auditoria no Kontrolu Kualidade (2021-2023). Nuudar membru Konsellu Jeral UNTL husi tinan 2015 too 2016.
Nia halao knaar nuudar Adidu Komersiu iha Embaixada Republika Demokratika Timor-Leste iha Jakarta, Indonezia (2013-2015) ho nomeasaun husi Sua Exelensia nuudar Ministru Komersiu no Industria Governu Konstitusional dalima.
Hahu hosi tinan 1994, sai hanesan membru hosi organizasaun estudante “Rezistensia Nasional Estudante Timor-Leste” (RENETIL), neebe harii iha tinan 1988 hosi estudante timoroan sira iha Indonezia ho objetivu atu luta ba independensia Timor-Leste nian.
Iha loron 1 fulan Julhu tinan 2023, nia simu pose nuudar Ministru Ensinu Superior, Siensia no Kultura hosi Governu Konstitusional IX RDTL nian, hodi sai responsavel ba konsepsaun, ezekusaun, koordenasaun no avaliasaun polítika nian ba area sira ensinu superior no kualifikasaun nian, no mos ba area sira siensia no teknolojia nian. Universidade Nasional Timor Leste, Institutu Politekniku Betano, Institutu Nasional Siensia no Teknolojia, no Ajensia Nasional ba Avaliasaun no Akreditasaun Akademika, I.P., iha ninia autoridade nia okos.
No hakotu is hodi fila hikas ba nain nia kadunan Santo Lalehan iha loron 21 fulan abril iha hospital Nasional Guido Valadares.
(eme)
