DILI, STLTIMORLESTE.com – Maizumenus iha tuku 3:00 OTL, Ministru Rnsinu Superior, Siensia no Kultura (MESKK), José Honório hakotu iis iha servisu fatin, tanba ho Hipertensaun Arterial (tensaun aas) antes familia ho funsionariu sira evakua mai Hospital Nasional Guido Valadares (HNGV).
Nia dehan, relasiona ho MESKK, José Honório neebe hakotu iis iha oras tolu liu ba, evakua husi familia no lori mai HNGV nee iis laiha antes too HNGV. Maske ho kondisaun hanesan nee maibe ekipa sala emerjensia halo esforsu tomak halo Reaminasaun Cardiopulmonar (RCP).
“Ministru José Honório too mai, ekipa emerjeinsia halao nafatin nia knaar atu buka fila-fali fuan neebe para ona, ita tenta ativa fila-fali fuan, sira konsege halo duni manobras Reaminasaun Cardiopulmonar (RCP) maibe durate 25 menitus nia laran la konsege, entaun deside hapara, depois ita repete fila fali, maibe nia fuan para,” Diretor Servisu Asisten iha Clinica HNGV, Eliqio Agustino de Araujo Soares ba jornalista sira iha sala HNGV, Tersa (21/04/2026).
Nia esplika, Ministru too HNGV ho kondisaun iis laiha ona, maibe mediku sira iha HNGV kontinua halo atendimentu Reaminasaun Cardiopulmonar (RCP) ba Ministru hodi halo mak konjuntu de medida emerjensia neebe halo atu salva moris ema ida neebe sofre parada cardiorespiratória (fuan para ona).
Nia deklara, iha ninia istoria no HNGV rekolha dadus katak, Ministru José Honório antes nee sofre ho Hipertensaun Arterial (Tensaun aas) maibe nia labele hemu aimoruk ladun diak no ladun kontrola ninia moras Hipertensaun Arterial (Tensaun aas), entaun iha parte mediku nian posibilidade nia atakasaun fuan.
“Tuir informaaaun neebe ita rekolha husi familia no akompanhamentu katak, Ministru José Honório iha servisu fatin iis laiha mak foin lori mai, entaun parte husi mediku sira hatete katak posibilidade atakasaun fuan, kauza bele mos ninia tensaun aas nee,” nia deklara.
Iha fatin hanesan, fontes konfirmadu esplika, Ministeru José Honório, dadersan ba Hera hodi asina akordu ho Jepan kona-ba bolsu estudu Politeknik Hera, no fila husi Hera mai direita ba servisu fatin hodi deskansa oituan.
“Ministru too iha servisu fatin, nia haruka kondutor ba fase kareta, depois hau mak iha neeba, maibe la kleur matebian ba haris fatin, hau hein la sai mai durante 20 minitus hanesan nee, depois hau ba dere odamatan la hatan, hau loke odamatan ita nia Ministru monu iha haris fatin laran, depois hau hakfodak hakilar ami lori mai Emerjeinsia maibe iis laiha ona mak ami foin lori mai,” nia deklara.
Nunee mos Membru PD, Fernandino Vieira da Costa informa, hakfodak tebes ho informasaun neebe husi media sosial katak Ministru José Honório fila hikas ona ba Maromak, triste tebes tanba Ministru José Honório matenek no pasiensia no servisu neebe diak tebes iha Governu ida nee, no responsabilidade nuudar liderasan iha MESKK.
“Ita hotu hakfodak la espera katak informasaun sai husi media sosial katak matebian Ministru José Honório fila hikas ona ba Maromak,” nia koalia.
Nia afirma, matebian Ministru José Honório sei lori ba UNTL no PN, nomos sei ba Sede PN, nomos matebian sei lori ba ninia rezidensia Munisipiu Likisa. Maibe matebian ninia uma iha Dili mos iha parese matebian sei lori ba neeba.
(jen)
