DILI, STLTIMORLESTE.com – IX Governu Konstitusional nomeia Prezidente Autoridade Rejiaun Administrativa Espesial Oecusse-Ambeno (RAEOA ) ho estrutura tranzitoriu deit, la permanente.
Primeiru Ministru Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta iha palasiu Prezidensial Nicolau Lobato Bairo Pite, Kinta (23/04/2026 hatete), maske Primeiru Ministru lao haleu munisipiu hotu hodi prepara aan ba dezentralizasaun Governu lokal maibe hateke ba Oecusse sei atrazadu liu.
Tanba nee Primeiru Ministru Kay Rala Xanana Gusmao mai imforma ba Prezidente Republika katak, depois halo tiha tranzisaun iha Oekusse nee, estrutura neebe Governu nomea tranzitoriu hotu, la permanente, la dura.
“Importante tebe-tebes ida mak konaba RAEOA, ita boot sira hatene katak, ita lao hela iha prosesu desentralizasaun ba governu lokal. Imi balun lao hamutuk ho hau, tuir hau too iha munisipiu hotu-hotu, hodi haree iha kada munisipiu area saida mak sira presiza kurije, iha area saida mak sira presiza hametin, neebe sira bele prepara aan atu sai governu lokal,” dehan Primeiru Ministru.
Primeiru Ministru hatete governu lokal laos deit atu simu kargu, maibe sira servisu ona nuudar governu, no mos depois iha eleisaun asembleia munisipal buat sira nee hotu.
“Maibe hateke fali ba Oekusse, Oekusse atrazadu liu, tanba tinan 10 resin iha Oekusse Prezidente Autoridade mak deside hotu, buat ida la too ba kraik, hasoru kraik ita husu la hatene, tanba iha Oekusse nee desizaun ema ida nian deit. Sistema finanseiru mos la lao tuir regra neebe ita aplika iha Timor tomak ho ida nee mak, hau kleur ona la ba iha Oekusse, tanba ami hili, haruka fali Ministra Finansas mos ba, Ministru Administrasaun Estatal mos ba, tanba tama iha programa desentralizasaun. Ministru Obras Publika, MPIE, saude ba hotu hodi haree katak, ita prepara didiak iha ema kompetente atu kaer area hotu-hotu neebe funsiona iha Oekusse,” katak PM Xanana.
Tanba nee Primeiru Ministru informa ba Prezidente Republika katak, depois halo tiha tranzisaun iha Oekusse nee, estrutura neebe nomea tranzitoriu hotu.
“Tranzitoriu nee katak, la permanente, la dura, tranzitoriu hotu neebe horsehik ezonera hotu fali, ohin Ministru Administrasaun Estatal, Tomas Cabral iha Oekusse atu fo posse ba estrutura foun. Prezidente mak kontinua Regio da Cruz, estrutura foun, sekretariu rejionais, direitores, servisu hotu-hotu neebe ohin,” katak PM Xanana.
Xefe Governu hatete iha rezolusaun nee hatete kedas, tinan ida mais sei akompana nafatin fulan rua, tolu haree ba la dezempena didiak signifika la hatene servisu ida nee ka lakohi nee hasai tau fali seluk.
Tanba iha Oekusse hanesan mos iha Timor laran tomak, iha neeba so Oekusse oan deit mak sei kaer distinu povu no rejiaun Oekusse nian nee mak mai fo hatene ba Prezidente Republika.
Nunee mos Governu liu husi Konsellu Ministrus aprova ona projetu Rezolusaun Governu, neebe aprezenta hosi Ministru Administrasaun Estatal, Tomas do Rosario Cabral, ba ezonerasaun dirijentes servisu iha Rejiaun Administrativa Espesial Oekusi Ambenu (RAEOA) neebe nomeia liu hosi Rezolusaun Governu n. 37/2025, loron 27 fulan-agostu, no nomeasaun ba Prezidente, Sekretariu no Diretor Rejional sira RAEOA nian.
Ho Rezolusaun ida-nee, Diretor-Jeral Rejional no Diretor Rejional sira neebe halao hela funsaun hetan ezonerasaun, no Regio da Cruz hetan nomeasaun nuudar Prezidente RAEOA. Nomeia mos Sekretariu Rejional sira maka hanesan Salvador da Cruz, ba Administrasaun no Finansas, Francisco Loca, ba Planeamentu no Dezenvolvimentu, no mos Merita Marques Lafo, ba Asuntu Sosial no Organizasaun Komunitaria.
Tuir mai, hetan mos nomeasaun nuudar Diretor Servisu Rejional sira hanesan Domingos Punef, Adelaide Rosalia Faria Correia, Amâncio Aguido Punef, Augusto Jorge de Fatima Efi, Mario Coel, Anita da Costa Ruing, Vicêncio Cono, Odete Amado Martins, Andre Lao, Remigio Nuno Sila, Yoseph Ili, Jose Oki, Anastasia Eni, Fatima Olga Hei Amaral, Tomas Jose Tanessib Anuno, Julio Coel, Domingos de Almeida, Orlando Quelo, Jose Ase Neno Colo, Cândido dos Reis Amaral no Jaime Taeque.
(eme)
