DILI, STLTIMORLESTE.com – Primeiru Ministru Kay Rala Xanana Gusmão hatete, foin lalais hasoru malu ho Enviada Espesial Australia ba Projetu Greater Sunrise, Katrina Cooper.
Primeiru Ministru Kay Rala Xanana Gusmão ba jornalista iha Palasiu Prezidensial Nicolau Lobato, Bairo Pite, Kinta nee (23/04/2026) mai informa ba Prezidente Republika katak, iha semana kotuk, Primeiru Ministru hasoru ho Katarina Cooper nia mak reprezenta estadu Australiano, iha negosiasaun neebe halo ho MPRM ho mos Timor Gap, ho mos sira neebe kaer Timor nia greater sunrise.
“Hau informa buat nee balun lao daudauk, ita husu boot too iha Jullu bele buat sira neebe falta nee asina hotu tiha ba, nunee ita bele dudu ona sasan,” katak PM Xanana
Primeiru Ministru hatete remata hasoru malu ho Katarina Cooper lokraik simu fali Eis Ministra neebe agora CEO ba Timor Recourse nee mak kompana neebe iha nee Australiana ida neebe buka gas ho mina iha rai laran.
Antes governu nee toma posse Timor Recourse kee ona fatin rua iha neeba, iha problema uitoan depois rezolve tiha.
“Agora ho senora Juli ita buka katak, fura nunee bele haree kuantidade boot karik ka kiik ka nusa. Se boot diak tebe-tebes, iha tan gas karik diak tebe-tebes tanba ita nia sentral eletrika rua, Betano ho Hera nee iha ona, bainhira ita halo, ita fo dalan, gas karik hatama,” dehan PM Xanana.
Xefe Governu hatete enerjia neebe Timor bele rekolla husi loron, enerjia solar rekolla hatama nunee redus kuantidade mina neebe tau iha neeba.
“Neebe senora Juli kontente loos, informa katak, sira sei halo buat hotu-hotu, ita bele hetan lalais, tanba laos deit iha neeba, iha mos fatin seluk neebe sira atu buka haree took. Liu-liu agora neebe, problema funu iha mediu oriente neebe sei nunee hela deit, ita la hatene bainhira loos,” katak PM Xanana.
Foin lalais Primeiru-Ministru, Kay Rala Xanana Gusmão hasoru malu, ho Enviada Espesial Australia ba Projetu Greater Sunrise, Katrina Cooper, iha ambitu vizita traballu nee ho objetivu atu akompana no aprofunda diskusaun bilateral kona-ba dezenvolvimentu projetu nee.
Durante sorumutu nee, enviada australiana, neebe akompana hosi Embaixadora Australia ba Timor-Leste, Caitlin Wilson, no Primeiru-Ministru, akompana hosi Ministru Petroleu no Rekursus Minerais, Francisco da Costa Monteiro, halo pontu situasaun kona-ba negosiasaun neebe lao hela, daudaun nee iha faze avansada, ho foku ba finalizasaun dokumentu prinsipal tolu Kontratu Partilla Produsaun, Rejime Fiskal, no Kodigu Mineiru Petroleu, neebe ida ikus nee konklui ona.
(eme)
