DILI, STLTIMORLESTE.com – Jeneral Reformado Lere Anan Timur hatete, foinsae presiza hatene istoria, tanba nasaun nee hetan ukun rasik aan, ema rihun ba rihun mak fakar raan no ruin, nunee aban bainrua kaer ukun tenke tau intrese nasaun aas ho espiritu nasionalizmu no patriotizmu.
Jeneral Reformado Lere Anan Timur ba jornalista sira iha salaun UNTL, Sesta (24/04/2026) hatete, jerasaun foinsae mak futuru nasaun nia, kuda espiritu nasionalizmu no hatene istoria, nunee aban bainrua kuandu kaer ukun tenke tau intrese aas duke intrese individu.
Jeneral Reformado ho lider tuan sira nafatin fo hanoin no hatudu dalan no ezemplu ba foinsae sira, nunee aban bainrua jerasaun tuan laiha sira bele lao tuir dalan neebe jerasaun antigu husik hela ba sira.
“Ami neebe katuas sira, ami neebe uluk halo funu harii nasaun ida nee ami lakohi para aban bainrua kuandu ami laiha nee ita nia nasaun laiha romu laiha dalan, agora enkuantu ami sei moris hanesan hau no maluk seluk lideransa neebe uluk harii nasaun ida nee tenke agora, laos tarde, hatudu dalan ba sira atu aban bainrua bele tuir, hanesan ohin hau dehan katak sira nee mak futuru lideransa nasaun ida nee nia, sira nee mak aban bainrua kaer kuda tali Timor nian, entaun sira iha ona espiritu nasionalizmu patriotizmu para sira labele mate, hanesan ai ida karik lakan nafatin, lakan nafatin nee presiza hatene istoria, hatene konsikuensia funu ba ukun rasik aan ida nee, para ikus mai sira labele hanoin katak ita ukun nee mai husi milagre ida ka ou ema mak laran diak fo ukun aan ba ita,” dehan Jeneral Reformado Lere Anan Timur.
Bainhira foinsae hatene istoria Timor Leste nian mak bainhira okupa kargu ruma iha estadu ka Governu sira foti intrese nasaun liu nia intrese, tanba sira hatene katak harii nasaun nee laos ema ida rua mak harii maibe ema rihun ba rihun fakar ran hodi lori rai nee hetan ukun rasik aan, ohin loron bele joga liberdade, tanba nee servisu tenke ho responsabilidade, foti aas intrese nasaun liu intrese pribadu.
“Ida nee mak objetivu, ami tenke buka fo hanoin nafatin ba ita nia oan no beioan sira atu aban bainrua lao tuir dalan neebe uluk aman no avo sira lao ba, hanesan babain dehan katak tuir ami nia ain fatin, “ dehan Lere.
“Maibe bainhira sira hatene istoria, kuandu sira okupa kargu ruma husi estadu ou governu neeba sira foti interese nasaun nee liu sira nia interese, tanba sira hanoin katak harii nasaun ida nee laos ema ida rua mak harii nasaun ida nee, maibe ema rihun ba rihun fakar tiha raan mak harii nasaun ida nee, hau tur iha nee hau tenke servisu ho responsabilidade, entaun hau foti aas interese nasaun nian liu interese hau nian, ida nee mak objetivu ami tenke buka fo hanoin nafatin ba ita nia oan sira, ita nia beioan sira atu aban bainrua lao tuir dalan neebe ninia aman no avo sira lao,” katak Lere.
Nunee mos Filipe Mendes Perreira, Dekanu Fakuldade Ekonomia de Gestaun UNTL hatutan tan katak, seminariu nee hanesan atividade parte akademiku nian oinsa prepara atu bele hetan metas neebe mak univerisdade hatoo ona, no sira bolu fundador sira hanesan Eis Xefe Estadu Maijor Jeneral Lere Anan Timur mai atu bele fahe sira nia esperiensia no kada tinan sira sempre konvida fundador sira atu nunee bele fahe esperiensia ba jerasaun foin sae sira para eleva sira nia kapasidade.
“Seminariu nee hanesan atividade parte akademiku ninian oinsa prepara atu bele hetan metas neebe mak universidade hatoo ona dehan sai exelensia, entaun atu sai exelensia nee parte ida para atu bele eleva konhesimentu, tantu dosente tantu estudante para konhesimentu alegadu atu sira nia konhesimentu iha area akademiku nian. Tanba ita hatene katak depoisde 1999 nee ita indepedensia ona ita nia jerasaun foun sira nee dalabarak lahatene istoria ida nee hanesan ita sira nee hatene istoria ida nee mais sira lahatene istoria oinsa para sira mai hanesan ita nia boot sira nee ita nia fundador nasaun sira nian sira bele mai konta,” katak nia.
Nia hatutan, laos ida nee deit tinan uluk sira konvida eis prezidente Taur Matan Ruak, sei konvida nafatin fundador sira atu partila sira nia istoria sira nia esperensia ba jerasaun para eleva sira nia kapasidade.
(eme)
