DILI, STLTIMORLESTE.com – Jeneral Reformado Lere Anan Timur hatete, too agora seidauk deklara ba publiku atu kandidata aan ba Prezidente Republika iha periodu 2027.
Jeneral Reformado Lere Anan Timur ba jornalista sira iha salaun UNTL, Sesta (24/04/2026) hatete, nuudar ema sempre iha ambisaun, no ambisaun laos ba nia aan propriu, ambisaun serbi rai ida nee, ezemplu atu serbi rai ida nee liu husi halo tos, natar, tau matan ba familia, ida nee mos serbi ona nasaun nee, tanba kria ona situasaun ida neebe hakmatek.
Jeneral Reformado Lere dehan, konaba familia bele dehan katak familia mak forma estadu, familia mak forma nasaun, mais serbi deit familia nee buat kiik, serbi nasaun buat seluk.
“Hau funu 24 anos tanba kauza ida laos kauza ba hau nia familia, kauza ba hau nia aan, maibe kauza ba povu Timor tomak, katak Timor tenke ukun aan, tenke kore aan husi kolonializmu, tenke sai husi presaun, entau hau serbi duni 24 anos, no hau sei bele hanesan baibain, hau dehan katak hau sei bele, hau sei iha forsa hau fo buat neebe hau bele, agora dehan kandidatu aan ba Prezidente ka la kandidatu nee hau hanoin katak tempu seidauk too tanba Prezidente mos seidauk dekreta loron eleisaun nia,” dehan Lere.
Jeneral Reformado Lere dehan, agora nia atu koalia ka la koalia ema konhese nia, se indonezia konhese tanba sa Timor oan la konhese.
“Indonezia sira hau nunka konhese sira nia avo sira konhese hau agora ita Timor oan ho Timor oan rai kiik oan nusa la konhese, balun dehan agora nee ita tenke lao halo dor to dor, hau dehan ita nia povu matenek ona, se mak serbi lo-loos nia intrese, se mak husi ibun tutun deit, no balun koalia la tuir fali saida mak koalia husi ibun tutun, saida mak nia koalia nee, hau prontu ba kualker servisu neebe povu fo ba hau, laos ema mak fo maibe povu mak fo ba hau, ezemplu se hau kandidata aan ba Prezidente se povu konfia hau sai prezidente, sim hau iha nee nuudar servidor, hau serbi nasaun no serbi povu, maibe hau seidauk deklara aan, Prezidente mak dehan hau kandidata aan nia mak deklara hau nia kandidata aban bainrua hau husu maun iha osan tulun hau para kandidata aan maibe hau seidauk deklara,” katak Jeneral Reformado Lere.
Karik aban bainrua posibilidade atu kandidata karik ho indepedente ka husi CCF, hatan ba kestaun nee Jeneral Reformado hatete, buat hotu hotu iha mundu nee posivel laiha imposivel.
“Ita ema mak dehan imposivel maibe laiha imposivel, hau hatene katak hau Comite Central FRETILIN, segundu jerasaun, hau laos se mak foti hau CCF laiha, hau nee udan, anin mak halo hau sai membru Comite Central segundu jerasaun, laos hau mesak, ami nain 9, nain 8 mate hotu ona hela hau mesak,” katak Lere.
Karik kandidata aan husi Partidu FRETILIN ka oinsa? Hatan ba kestaun nee Lere hatete, daudaun nee FRETILIN muda ona estatutu.
“Kuandu hau tama mai sira muda kedas estatutu so CCF mak bele deside se mak Prezidente, bele ba Prezidente, se mak labele, uluk laiha, uluk nee se mak Sekretariu Jeral, se mak Prezidente Partidu bele kandidata aan ba Prezidente Republika, no Primeiru Ministru maibe agora laiha.
Agora nee estatutu Partidu FRETILIN dehan katak CCF mak deside se mak ba Prezidente, no bele hili laos CCF mos bele hili ba Prezidente, kualker militante babain mos bele, konforme CCF deside.
(eme)
