DILI, STLTIMORLESTE.com – Jeneral Reformado Lere Anan Timur hatete, nia kartaun militante FRETILIN laos Sekretariu Jeral Partidu FRETILIN, Mari Alkatiri mak fo ba nia, maibe Xanana Gusmão mak fo.
Jeneral Reformado Lere Anan Timur hatoo kestaun nee ba jornalista sira iha salaun UNTL Kaikoli, Sesta nee (24/04/2026).
Nia hatete, liga ho deklarasaun husi Sekretariu Jeral Partidu FRETILIN, Mari Alkatiri katak, membru CCF neebe kandidata aan independente tenke entrega kartaun militante, ho ida nee Lere hatete, nia kartaun laos Mari mak fo, maibe Xanana Gusmao mak fo.
Jeneral Reformado Lere Anan Timur hatete, daudaun nee estatutu Partidu FRETILIN muda ona dehan katak CCF mak deside se mak ba Prezidente, no bele hili laos membru CCF mos bele hili ba Prezidente, kualker militante babain mos bele, konforme CCF deside.
Eis Komandante F-FDTL, Lere dehan, hanesan ema hotu rona husi Sekretariu Jeral Partidu FRETILIN, Mari Alkatiri dehan too agora CCF seidauk iha kandidatu, karik se mak kandidata independente entrega kartaun militante.
“Entrega kartaun nee, hau nia kartaun laos ita boot mak fo, hau nia kartaun nee uluk Xanana mak fo, neebe hau ba entrega ba Xanana, hau membru Comite Central laos uluk ita boot mak iha oin, uluk Xanana iha oin ami jura ba iha neeba, kartaun nee saida maibe kestaun hirarkia displina partidu, tanba nee hau sei kandidata aan independente mos hau tenke fo hatene ba hau nia partidu katak hau atu kandidata aan ba Prezidente mais independente, se imi hakarak fo apoiu bele apoiu, se hakarak kandidata hau kandidata, FRETILIN nee hau nian, maibe entrega kartaun nee mak hau duvida,” katak Lere.
Eis Komandante F-FDTL dehan, FRETILIN nee ninia tanba nuudar segundu jerasaun, agora hela nia mesak, maibe konaba deklarasaun husi SEKJER Mari Alkatiri katak entrega fali kartaun nee mak halo nia sai duvida.
“FRETILIN nee hau nian, maibe entrega kartaun nee mak hau duvida, entrega kartaun atu apoia hau ka, hau dehan imi la apoiu votus mos diak, apoiu deit osan fo US$ 10 milhões, ida nee hau dehan los ona,” katak Lere.
Karik kandidata aan duni ho independente sei entrega kartaun ka lae? Hatan ba kestaun nee Jeneral Reformado Lere dehan, nia kartaun laiha, nia kartaun mak liman fuan tuk nee.
“Hau nia kartaun laiha, hau nia kartaun mak hau nia liman fuan tuk nee, karik entrega tiha hau nia liman fuan karik,” katak nia.
Foin lalais Sekretariu Jeral Partidu FRETILIN, Mari Alkatiri husu membru Komite Sentral FRETILIN neebe hakarak kandidatu aan ba Prezidente Republika (PR) periodu 2027-2032 husi dalan independente, tenki entrega kartaun militante FRETILIN.
Alkatiri rekonhese FRETILIN hanesan partidu boot ida, neebe que iha kuadru no ema matenek tan nee ema hotu-hotu hakarak kandidatu aan ba Prezidente Republika.
Maibe tuir nia, tuir estatutu Partidu FRETLIN nian atu deside kandidatu Prezidente Republika tenki liu kongresu ida, no too agora FRETILIN seidauk deside atu kandidatu membru CCF balun ba iha Prezidente Republika. Nia dehan, se membru Komite Sentral FRETILIN ida mak hakarak deside kandidatu aan Prezidente Republika liu husi dalan independente mak obrigatoriu, tenki entrega fila fali kartaun militante.
“Hau husu deit sira dehan kandidatu independente nee atu entrega kartaun, nee mak hau husu ba sira, se independente duni entrega kartaun,” hatete Alkatiri.
(eme)
