DILI, STLTIMORLESTE.com – Ministeriu Eduksaun (ME) atribui ona konsesaun eskolar ba ensinu sekundariu jeral públiku hamutuk 77, maibe husu eskola keta haluha halo fali relatóriu mai ME.
Haktuir Diretor Nasional Ensinu Sekundariu iha ME, Benjamin Gomes da Cruz Fernandes ba STL iha nia knaar fatin, Segunda nee (27/04/2026).
“Konsesaun eskolar nee agora daudaun atribui hotu ona ba ita nian eskola sira, nee duni atribui hotu ona ba iha Munisípiu, eskola privadu falta Taur Matan Ruak foin mak asina, hodi halo transfer ba,maibe Munisipiu hotu-hotu ninia prosesu lao, maibe balun agora foti hela ona osan konsesaun eskolar,ita atribui ona konsesaun ba ita nian eskola 77, nee ita nian eskola públiku, pribadu nee hela deit mak eskola Taur matan ruak,” katak nia.
Benjamin hatutan, montante konsesaun nee rasik nia rasik ladun lembra didiak, maibe presiza husu ba iha xefi departamentu, konsesaun nee atribui iha semana ida nee nian laran, tanba nee,konsesaun nee atribui ba iha eskola Sekundáriu públiku ida-idak, numeru eskola sekundariu 77, nee eskola públiku deit.
“Eskola pribadu iha haat ou lima nunee, lima mos hela deit mak eskola ida Taur matan ruak nee foin asina, maibe sira seluk nee lao ona, nee duni husu ba eskola sira bele foti ona sira nian osan iha Konta bankaria, ho nunee bele ezekuta, maibe keta haluha halo fali relatóriu konsesaun mai iha Ministériu,” tenik nia.
Nia dehan,liu husi media ida nee atu fo hatene katak, agora nee relatóriu tenke aneska ho print Konta bankaria husi banku hanesan mak labele, nee duni relatóriu tinan nee kada eskola tenke print out konta bankaria aneksa, atu nunee husi ME hatene katak, saldo iha nee ba hela hira.
Iha sorin seluk, Diretor eskola sekundariu jeral 10 de dezembru Comoro, Manuel Verdial hatete, konaba konsesaun eskolar nee husi parte eskola nian seidauk ba chek iha banku, maibe karik iha tempu mak ba chek iha banku.
“Konaba konsesaun eskolar nee tama ona ou lae, hau seidauk ba chek, maibe depois mak hau ba chek, osan nee ami sei uza tuir nesesidade eskola nian presiza, hanesan hadia sala de aula neebe mak seidauk diak no seluk tan,” nia dehan.
(jac)
