DILI, STLTIMORLESTE.com – Tuir Komandante Unidade Polisia Máritima (UPM), Superintendente Xefe Polísia Eugénio Pereira hateten, Tribunál Judisiál Primeira Instánsia Baukau (TJIPB) hasai despaixu faan tiha ikan tonelada sia (9) neebe nuudar objetu apreendidu neebe Unidade Polisia Máritima (UPM) halo apreensaun husi peskadór ilegál Indonéziu nain 32 iha área tasi mane zona Com Lautem, Sesta (18/4) foin lalais nee.
Nia dehan, Tribunál Baukau hasai despaixu hodi halo venda preventiva ba objetivu sira nee tanba bazea ba pedidu Komandu Munisípiu Lautein liu husi Ministeriu Públiku Baukau nian atu prevene objetu labele hetan estragus tanba nee Tribunál Baukau aseita Komandu PNTL Munisípiu Lautem no Ministeriu Públiku (MP) nian hodi faan tiha objetu apreendidu sira nee ba komunidade nee, objetivu sira nee labele hetan estragu.
“Venda preventiva nia nee ho ninian intensaun oinsa mak atu bele faan sasán sira nee (ikan) nian intensaun nee atu prevene liu ba iha estragus,” hatete Komandante Unidade Polisia Máritima (UPM) Superintendente Xefe Polísia Eugénio Pereira ba jornalista sira iha Komando Jeral PNTL, segunda (27/04/2026).
Nia deklara, momentu ekipa konjuta halo apreensaun ba roo nee komprova katak, Tripulante sira la loke Jerádór hodi rai ikan, nunee objetu sira nee atu estraga ho situasaun nee iis daudaun ona, entaun bele ameasa ba iha objetu nee rasik.
“Tanba nee mak ho situasaun nee Komando Unidade Polisia Máritima liuhusi Postu Kom hamutuk ho Komando Munisípiu Lautem aprezenta ba Ministeriu Públiku no MP ho situasaun sira nee halo promosaun ba Tribunál para husik Tribunál halo despaixu, nunee infelizmente Tribunál halo duni nia despaixu vende preventiva ba objetu nee para prevene tiha husi estragus,” nia esplika.
Nia informa, Komando Munisípiu Lautem hamutuk ho UPM Postu Kom faan ona ikan sira nee ba komunidade Lautem no osan sira husi venda preventiva sei enkamiña ba iha kofre Estadu.
Komandante Eugénio koalia, roo neebe Tripulante sira uza hodi halo peska no ilegál agora UPM lori mai ona hodi atraka iha Kuartel Polísia Maritima Seonál.
Nia hatutan, evidénsia sira iha roo nee mak rede peskas no laiha tan buat seluk. Momentu Unidade Polísia Maritima ho nia parseiru servisu sira halo apreensaun ba roo nee tanba halo hela atividade peska no ilegál iha tasi kosta súl área Kom nia tanba tuda hela rede peskas iha area referida, nunee autoridade seguransa ba halo apreensaun.
(jen)
