DILI, STLTIMORLESTE.com – Komandante Jerál Polisia Nasionál Timor-Leste (PNTL), Komisariu Assistente Polisia, Afonso dos Santos ho Segundu Komandante Jerál Polisia Nasional Timor Leste (PNTL), Komisaria Assistente Polisia, Natercia Eufrasia Soares Martins halo nomeasaun fo tomada de pose ba kargu xefia nain 11.
Nia hatoo kongratula no parabens ba emposadu ofisiais superior sira neebe simu tomada de pose, kontinua halao servisu ho responsabilidade hatudu disiplina sai ezemplu diak ba membru Polisia hotu, hametin relasaun diak ho komunidade no lideransa komunitariu ho Autoridade Munisipiu no Veteranus sira hotu atu garante estabilidade seguransa ba komunidade iha munisipiu ho diak.
“Hau nia liamenon mak nee, sai komandante munisipiu ho segundu komandante munisipiu no asume kargu xefia mak nee, imi tenke hatudu ezemplu diak ho disiplina ba membru PNTL hotu atu hametin relasaun diak ho komunidade ida baze liu liu lideransa komunitariu ho Autoridade Munisipiu no Veteranus no relijiozu sira no sosiadade sivil atu garante estabilidade páz ho hakmatek iha Territoriu Timor Leste,” hatete Komandante Jerál Polisia Nasionál Timor Leste (PNTL), Komisariu Assistente Polisia Afonso dos Santos ba jornalista sira iha Komando Jeral PNTL Kaikoli,Dili, Segunda (27/04/2026).
Tanba nee komandante munisipiu sira hotu kontinua kumpri ba irarkia Komando halao servisu disiplina kontrola membru PNTL hotu halo misaun mak servir no proteje, garante seguransa estabilidade páz ho hakmatek ba komunidade iha Territoriu Timor Leste.
Nia informa, ofisiais superior PNTL sira neebe simu tomada de pose ba kargu xefia hanesan komadante Munisipiu no Segundu Komandante Munisipiu sira mak hanesan Komandante PNTL Munisipiu Aleiu lidera husi Superintendente Xefe Polisia António da Luz, Komandante PNTL Munisipiu Manufahi lidera husi Superintendente Xefe Polisia Marcos Sequeira Nunes, Komandante PNTL Munisipiu Covalima lidera husi Superintendente Xefe Polisia Paulino Carmo Pereira no kargu segundu Komandante PNTL Munisipiu Vikeke Lidera husi Superintendente Polisia José Casemiro de Carvalho, Segundu Komandante PNTL Munisipiu Likisa lidera husi Superintendente Assistente Polisia Mateus da Costa Texeira no Segundu Komandante PNTL Munisipiu Manatuto, Miguel Soares de Araújo.
Aleinde nee ofisiais superior PNTL sira nee simu tomada de pose ba kargu xefia iha departamentu sira mak hanesan xefe departamentu ba Pesoal lidera husi Superintendente Polisia, Grasiano Moniz Amaral, Xefe Departamentu Protesaun no Natureza ba Ambiente lidera husi Superintendente Polisia Inacio Amaral, Xefe Departamentu finansa no orsamentu lidera husi Superintendente Polisia Helena das Dores Alves, Xefe Departamentu Polisiamentu Komunitariu lidera husi Superintendente Assistente Polisia, Domingos Sarmento Gama no Xefe Departamentu Aprovisionamentu Interinu lidera husi Inspetor Xefe Adelberto Mau.
Entretantu iha serimonia tomada de pose ba ofisiais superior nain-11 hetan partisipa masimu husi ofisisiais superiores Dirijente sira, Komandante Munisipiu, Komandante Unidade sira ho Xefe Diresaun no Xefe Departamento ho membru PNTL iha Kuartel Jerál PNTL Kaikoli.
(jen)
