BAUKAU, STLTIMORLESTE.com – Autoridade Suku realiza jogu komunitaria iha Kaisidu, Suku Tirilolo, Postu Administrativu Baukau Vila, Munisipiu Baukau.
Prezidente Komisaun Organizadora, Jeca de Assis Belo aprezenta, jogu komunitaria refere inisia atu selebra loron Komemorasaun Indepedensia Timor-Leste ba dala 24 neebe sei realiza iha loron 20 Maiu tinan nee, tanba nee Konselhu Suku Tirilolo inisia hodi halibur komunidade no jovem sira kompostu husi Aldeia Betulale, Kaisidu, Lutumutu, Lealailesu, Ossouala no Parlamentu.
“Jogu ida nee Suku laiha osan, ami nia karta iha fulan kotuk ba duni MJDAK maibe laiha resposta, tanba orsamentu anual nian nee ba hotu ona Postu, entaun kontribuisaun mai husi ami nia emprezariu Tirilolo oan sira,” hateten Jeca de Assis Belo ba jornalista sira iha Kaisidu hafoin remata abertura jogu komunitaria iha Segunda (27/04/2026).
Nia sublina, aliende diriji karta ba Ministeriu Juventude Desportu Arte no Kultura (MJDAK), komisaun organizadora liu husi Konselhu Suku Tirilolo aprezenta mos karta ba Gabinete Apoiu Sosiedade Sivil nian iha Prezidente Republika, maibe husi parte 2 laiha resposta apoiu finanseiru.
Nia fundamenta, mezmu husi parte 2 laiha apoiu, maibe emprezariu Tirilolo oan sira iha vontade, tanba apoiu finanseiru balu neebe realiza ona jogu refere no abertura direita husi Prezidente Autoridade Munisipiu Baukau, Veneranda Lemos.
“Jogu nee abertura husi Prezidente Autoridade Munisipiu Baukau, loos katak jogu ida nee atu prepara fini, ami labele fihir hetan maibe liu husi jogu ida nee Autoridade sira bele fihir ami nia jogador neebe mak diak,” Jeca komenta.
Iha fatin hanesan Prezidente Autoridade Munisipiu Baukau, Veneranda Lemos enkoraja, mezmu jogu komunitaria refere Autoridade Suku liu husi komisaun organizadora husi apoiu iha Governu Sentral no la hetan apoiu, nee laos problema no obstaklu hodi hamate atividade desportiva iha baze.
“Ita nia jogu ida nee ho espiritu atu komemora loron restaurasaun independensia atu ita hotu sente katak rai nee hau nian, feto no mane husu ba ita nia aan saida mak ita atu halo ba rai ida nee,” Veneranda louva.
Veneranda konsidera, Tirilolo oan iha duni vontade kontribui prosesu dezenvolvimentu area desportiva no seluk tan, tanba pratika hatudu inisiativa rasik kria jogu komunitaria anima joven no komunidade sira atu selebra loron nasional Timor nian neebe sei selebra iha 20 Maiu.
Tanba nee nia husu jogador sira atu matein pas no estabilidade iha jogu refere too remata nunee iha rezultadu neebe diak.
Enkuantu jogador husi klube futebol Under A Xisto Belo de Assis Bento sente agradese ba jogu refere, tanba Autoridade Suku inisia ona atu anima jovem no komunidade liu liu promove jovem talentozu desportiva nian.
“Jogu ida nee laos buka naman no lakon, maibe oinsa atu anima komunidade sira selebra loron importante Timor nian iha 20 Maiu,” Xisto salienta.
Entretantu jogu komunitaria refere kompostu jogu futebol no volibol hamutuk klube 22 involve feto mane no jogu nee hahu iha loron 27 Abril nee tuir planu sei termina iha loron 19 Maiu nee, neebe iha abertura nee hetan partisipasaun husi Autoridade Postu Baukau Vila, Autoridade Suku Tirilolo, Autoridade Seguransa Defeza husi Komponente Terrestre Lanud Baukau no aberta husi Prezidente Autoridade Munisipiu Baukau, Veneranda Lemos.
(tom)
