Baukau Oan Lori TL Sai Primeiru Lugar iha Kambodia

BAUKAU, STLTIMORLESTE.com – Marka istoria foun, Baukau oan nain 6 sai primeiru lugar iha kompetisaun internasional neebe realiza iha nasaun Kambodia.

Prezidente Autoridade Munisipiu Baukau, Veneranda Lemos orgulhu no konsidera Baukau nia Oan mesak matenek, tanba realidade hatudu iha semana kotuk estudante Baukau oan husi eskola Ensinu Baziku Katolika Santo António Teulale Baukau, nain 6 kompostu husi feto nain 5 mane nain 1 neebe lori Timor nian naran ba tuir kompetisaun iha Kamboja hetan primeiru lugar.

“Sira ba hetan primeiru lugar, Baukau nia oan sira reprezenta Timor-Leste iha rai liur sira manan, nee laos deit lori Baukau ba Mundu, maibe lori Timor-Leste Mundu,” Prezidente Autoridade Munisipiu Baukau, Veneranda Lemos hateten liu husi nia diskursu iha sesaun abertura ba jogu komunitaria iha Aldeia Kaisidu, Suku Tirilolo Baukau Vila, Segunda (27/04/2026).

Nia esplika, kompetensia kona-ba siensia matematika neebe involve estudante sira husi nasaun 27 inklui Timor-Leste, maibe orgulhu Timor neebe sei nasaun jovem, nia jovem sira kontinua marka istoria foun, tanba sai manan nain iha kompetisaun refere.

Nia komenta, Timor oan espesialmente Baukau oan neebe sai manan nain iha kompetisaun refere nuudar orgulhu ba Baukau oan tomak, tanba nee husu atu kontinua kria pas no estabilidade no enkoraja estudante sira atu kontinua estuda.

“Nee orgulhu boot ita nafatin lori atividade selu seluk hatudu katak Baukau nee metin no prontu ba dezentralizasaun,” Veneranda enkoraja.

Entretantu estudante nain 6 refere mak naran hanesan Florbella Ezania da Silva, Angel Grace Costa de La Rosa, Felia Nisa da Costa, Silviana Cardoso Carlos, Florzinha Evander Correa da Silva ho Leonardo Ricardo da Costa, neebe sai husi Timor-Leste ba tuir kompetisaun Premiu Internasional ba Kreatividade no Inovasaun (International Creativity and Innovation Award) 2026 durante loron tolu, hahu husi loron 24 too loron 26 Abril 2026 iha Kambodia.

(tom)