DILI, STLTIMORLESTE.com – Prezidente Republika (PR) Jose Ramos Horta halo enkontru ho Diretor Ezekutivu iha Fundu Monetariu Internasional (FMI) ou International Monetary Fund IMF), oinsa jere ekonomiku sira neebe mosu husi konflitu iha Mediu Oriente no estratejia sira atu sustenta kreximentu pozitivu Timor Leste nian.
Bainhira remata enkontru, Andre Roncaglia, Diretor Ezekutivu iha Fundu Monetariu Internasional (FMI/IMF) ba jornalista sira iha Palasiu Prezidensial Nicolau Lobato, Bairo Pite, Dili, Segunda (27/04/2026) hatete, sente ondradu mai hasoru malu ho Prezidente Republika Jose Ramos Horta no iha hasoru malu nee koalia kona-ba oinsa hametin parseria no reziliensia ekonomika ho Timor Leste.
Roncaglia louva dezempenhu ekonomiku nasaun nian, hodi nota katak sektor naun-petroleu kontinua dezenvolve aan enkuantu inflasaun nafatin kiik kompara ho nasaun vizinhu sira seluk iha rejiaun.
Diskusaun sira nee enfatiza importansia husi diversifikasaun ekonomika nasional no harii reziliensia atu proteje membru sosiedade sira neebe vulneravel liu. FMI reafirma ninia dedikasaun atu apoia dalan dezenvolvimentu Timor Leste nian liu husi hametin kuadru institusional no hadiak sistema finanseiru.
Kolaborasaun nee ho objetivu atu dudu investimentu sektor privadu liuhusi pratika kreditu neebe seguru, hodi garante katak progresu ekonomiku lori mos mudansa ba kualidade moris no bem-estar ba sidadaun hotu.
“FMI hakarak sai parseiru besik ida ho Timor Leste, hakarak ajuda nasaun nee atu harii ninia kuadru institusional, ajuda sistema finanseiru no fornese kreditu barak liu tan ba ekonomia ho dalan neebe seguru atu dudu investimentu husi setor privadu,” katak nia.
Iha biban nee, Prezidente Republika Jose Ramos Horta hatoo bemvindo ba Diretor Ezekutivu iha Fundu Monetariu Internasional (FMI/IMF) neebe mak halo enkontru ho Prezidente Republika iha Palasiu Prezidensial hodi koalia kona-ba oinsa hametin parseria no rezilensia ekonomika ho Timor Leste.
(eme)
