DILI, STLTIMORLESTE.com – Prezidente Republika (PR), Jose Ramos Horta hadomi nia povu, tanba nee vizita hodi haree direita vitima inundasaun nia kondisaun no fahe nesesidade baziku ba komunidade afeitadu iha Suku Suai Loro, Munisipiu Covalima.
Iha biban nee Prezidente Republika Jose Ramos Horta liu husi nia diskursu iha Suku Suai Loro, Tersa (28/04/2026) hatete, momentu akontesimentu udan boot hamosu inundasaun estraga komunidade nia uma nomos mota lori Kazal nain rua, tempu nee Prezidente Republika halo tratamentu iha Bali maibe rona imformasaun nee Prezidente deside kedas mai atu haree direita komunidade sira nia kondisaun no fahe netik aihan ruma hodi tulun vitima sira.
“Bainhira haree no rona akontese inundasaun hau halo desizaun kedas, hau loron rua iha liur iha bali halo tratamentu lalais Sabado Domingo Segunda fila maske iha Bali mak hau haree hau hatete kedas ba Ofice iha dili katak hau hakarak ba Suai ba haree situasaun iha neeba, tanba momentu nee maun Boot Primeiru Ministru mos ba tiha Singapura ho misaun boot negosiasaun konaba Fronteira Maritima ho indonezia, hau iha Bali loron rua entau hau hatete hau tenke ba povu labele mesak bainhira hasoru situasaun nunee,“ dehan Prezidente Republika, Jose Ramos Horta.
Prezidente Republika hatete se iha akontesementu nee mak Primeiru Ministru Kay Rala Xanana Gusmão iha Dili mai haree direita komunidade sira, maibe tanba Primeiru Ministru halao misaun importante iha Singapura oinsa rejolve Fronteira maritima ho Indonezia tanba nee Prezidente deside mai haree no fo apoiu aihan ruma ba Vitima sira.
“Primeiru Ministru iha Dili, hau hanoin nia aranka kedas mai, maibe tanba nia laiha hodi labele intrope enkontru boot nee mak halo desizaun mai, ajuda neebe lori mai nee hanesan lalais haree sasan oituan lori, no Sekretariu Estadu Protesaun Sivil iha nee bele esplika klaru liu tan saida mak Governu bele halo,” katak PR Horta.
Iha fatin hanesan, Sekretariu Estadu Protesaun Sivil, Domingos Mariano Reis agradese ba Maromak, tanba grasa nain Maromak nia ohin Prezidente Republika ho delegasaun hamutuk ho nia ho ekipa viajen husi Dili too mai Suai ho kondisaun diak tanba grasa nain Maromak nia.
“Ho grasa Nai Maromak nia mos ho inundasaun iha Suai maske afeita ita nia sidadaun nain rua lakon vida, ohin ami vizita ona, no barak mak salva aan tanba grasa Maromak nia,” katak nia.
Sekretariu Estadu hatete Vizita Prezidente Republika mai Suai nuudar aman ba nasaun nia hodi fo domin ba populasaun suai.
Nunee mos Xefe Suku Suai Loro, Manuel Gomes da Costa hatoo agradese ba Prezidente Republika ho nia ekipa neebe mak ho laran luak bele hakat ba iha Suai loro hodi haree direita vitima ba inundasaun neebe akontese foin lalais.
“Ba hotu hotu neebe dadaun nee hamutuk iha fatin ida nee hodi haree direita komunidade neebe foin lalais hetan inundasaun neebe mai halo terus ita, no ami agradese tebes ba nain Prezidente tanba ho laran luak tebes lasente kolen rona ami atan sira kuandu hetan sofrementu ho fuan boot hakat mai too ami nia fatin mesmo situasaun la permite maibe ho maneira ohin lokraik ida nee nain ulun boot timor nia ho nia ekipa mai too ami nia fatin tanba deit domin,” katak Xefe Suku.
Autoridade lokal nee dehan, inundasaun nee sempre akontese kada tinan iha fulan abril maiu sempre mosu inundasaun nee desde kedas iha tempu portugues nia tanba nee nia husu Prezidente atu hatoo ba Governu liu husi Ministeriu relevante nunee bele hadia ponte no irigasaun nunee bele fasilita komunidade hakat liu ba mai, tanba dadaun nee Lafaek mos barak iha mota laran.
Xefe Suku Suai Loro, Manuel Gomes da Costa hatutan tan katak, komunidade neebe simu nesesidade baziku husi Prezidensia Republika uma kain 25.
Xefe Suku hatete, uma kain 25 nee foti provizoriu deit tanba vizita Prezidente Republika tanba nee Autoridade lokal foti provizoriu deit uma kain 25 maibe vitima ba inundasaun foin lalais uma kain barak no komunidade neebe afeitadu nee husi aldeia Manik, aldeia Loro ho aldeia akar laran, no dadus seidaumk foti hotu.
Total populasaun iha Suku Suai Loro kompostu husi aldeia 5 ho habitante hamutuk 4.893 kompostu husi mane 2.468 no feto 2.421, total uma kain 1.293.
(eme)
